Tizza, d taddart am tuddar n Leqbayel merra ; d isem-is i d anamek-is (asget n tizi) . Taddart-a tezga-d di tɣiwant n Ɛemmal agezdu n bumerdes.
Akken uɣen tannumi, yal aseggas sfugulen amenzu n yennayer iɣef i d-tella deg lmendad tddukkla « Tafat ». Tasebḥit n ssebt 13 janvier, nerza ɣer-sen akken ad nzer ayen xeddmen i lmend n yixef n useggas. Deg ubrid yettawin ɣer taddart-a, yeččur rrif-is d iblaz ( banderoles) iɣef ttwarunt tenfaliyin yesεan assaɣ akked tegnit-ayi. Syin, nemlal iεeyyalen n tdukkkla «Tafat» i yettmaggaren inebgawen s wudem yumren d uwelleh-nsen ɣer wadeg n tmeskant-ayi. Tessumer-d tddukkla-agi yiwen n wahil d amerkanti i yekkan si tsebḥit armi d tameddit. Gar wayen i d-thegga, ad naf, adal, tinḍi (artisanat), taklut, amezgun akkedd yisaragen, mebla ma nettu seksu (lmesfuf) i yinebgawen i d-yerzan ɣer din. Ayen i d-ijebden lwelha-nneɣ deg waya, d tajmilt i terra tddukkli i sin n yirgazen yewwḍen leεfu n Rebbi ilindi, wiyi d Ɛli n Saεid Buljennet akked Ḥamid n Rebbuḥ Ǧelluli. Irgazen-a, llan ttεawanen aṭas ilemziyen n «Tafat» akken i aɣ-d-yenna uselway-ines Muxtar Buljennet. Nfuṛes tagnit akked uselway-ayi, i wakken ad t-nesteqsi ɣef wayen txeddem tddukkla-nsen, ɣef waya yenna-d : « Zyada ɣef n yineḍruyen i icudden ɣer tmagit tamaziɣt, tqeddec tddukkla Tafat deg unnar n twennaḍt d umahil ametti i deg tettawes tiwaculin ixuṣṣen ». Γer taggara, ad d-nini d akken asfugel n yennayer deg Tizza, ad yeqqim yeẓẓa deg wallaɣ n yal win i d-yerzan ɣer-s, ayuz i yimezdaɣ-is d tddukkla Tafat.
Mansour Bouljennet