Gar tɣiwanin timenza deg lɣella n uzemmur deg ugerzu n Tizi-Uzzu, ad naf taɣiwant n Lemɛatqa, yesɛan ugar n 3000 n ihikṭaren n wakal ideg yella uzemmur, i d-yeggaren azal n 60 000 n yiqenṭaren n uzemmur deg useggas. Ma neserwes gar sin yiseggasen iɛeddan, ad naf d akken aseggas-agi, tennerna s waṭas lɣella n uzemmur deg temḍiqt-agi n leqbayel. D ayen i d-yenna imeḍebber amezwaru n srabes n tfellaḥt n dayra n Lemɛatqa, Mass Mezyani : »Anerni n lɣella, yusa-d deg tazwara imi ur telli ara lɣella deg useggas iɛeddan, dɣa aseggas-agi tella. Rnu ɣef waya, leqdicat n uwelleh, d useɛlem ɣef ilugan igerrzen deg tfellaḥt n uzemmur, ama dayen yeɛnan afras d lemḥadra n tejra ». Aḥric n lɣella n uzemmur, d aḥric agejdan deg temḍiqt-agi n Leqbayel, yettwaḥsab d tallelt n tedrimt i kra n twaculin , dɣa aḥric-agi, yesɛa assaɣ adelsan d wuden adamsan, dayen icudden ɣer wansayen n Leqbayel. Tesɛa dayra n Lemɛatqa ugar n 50 n tesyar n uzemmur, d amḍan ad d-iwekkden s wazal yesɛa uḥric-agi deg tdamsa n dayra-agi, ladɣa ma ad naf ilemezyen, raṭlen-d tadrimt i usefti deg waḥric-agi.
Ali Zalouk