Ussan-agi yezrin, teḍra-d yiwet n temlilit n yimḍebbren n twilayt n Tubiret s lmendad n Ali Bouguerra, iwakken ad sqerdcen tamsalt n useggas aɣurbiz 2009/2010. Ahil n temlilit icudd di tuget-is ɣer ttawilat yellan gar yifassen n twilayt d wamek ara tqabel inelmaden. Di tazwara, “le DLEP”, yessuk-d awal ɣef yiɣerbazen imaynuten ara yeldin tiwwura-nsen aseggas-a. Yemmeslay-d ɣef 04 tesnawiyin yerzan taɣiwant n Taɣzuyt ara iqablen azal n 485 yinelmaden, Lesnam 454, At Mensur akked Decmiya 224 yinelmaden. Am wakken i d-yebder tulya n 10 yiɣerbazen ilemmasen, 11 deg uswir amenzu, asnerni n kra n yiɣerbazen s wazal n 39 tzeɣwa d 42 lkantinat. Deg wawal-is, imḍebber-agi yenna d akken deg wussan imenza n waggur n wunbir, akk iɣerbazen-agi ad ldin tiwwura-nsen s wudem unsib. Ma nmuqel amḍan-agi, ad d-naf Tubiret tesnerna deg lebni n yiɣerbazen, tessaweḍ ɣer 670 mi akken tella di 646. I useggas-agi, tawilayt ad tqabel 161368 yinelmaden deg-sen 2685 d imaynuten. 530 yiɣerbazen imenza ad ldin tiwwura-nsen tikelt-a i wazal n 71718 yinelmaden, ayen i d-yessebganen timerna n wazal n 3306 yimeɣriyen ɣef useggas yezrin. Ma d wid ara yilin di tesmilin n uheggi (classes préparatoires), amḍan-nsen ad yaweḍ ɣer 9550. Iɣerbazen-agi imenza, ad ilin deg-sen 4330 yiselmaden akked 490 yinemhalen. Ma 390 lkantinat yellan yakan, ad ttnawalent azal n 50777 tiram n wučči i wass.
Aswir alemmas deg-s 103 yiɣerbazen, 10 seg-sen d imaynuten, ad qablen 64764 yinelmaden ara sseɣren 3998 yiselmaden. Hala 81 lakulat i yesεan lkantinat ara yessewjaden 27761 n tiram n wučči i wass. Am wakken yetturaju lebni n tiyaḍ di yal aɣerbaz.
Tubiret yesεan 38 tesnawiyin, 04 deg-sent d timaynutin, ad tqabel anekcum n 24873 yinelmaden. Ayen i d-ibegnen zyada n 1561 ɣef useggas yezrin. 37 tesnawiyin sεant lkantinat, am wakken ara naf 27 yiɣerbazen-a kesben ttawilat iwakken ad ttnusun yinelmaden dinna.
Si tama-s, anemhal n usegmi n Tubiret yemmeslay-d ɣef usewjed n yimukan imaynuten n lxedma. 1074 yimukan i d-heggan. D acu kan, ɣef leḥsab n umeslay-is, yenna-d yerra deg ufus n yinemhalen n yiɣerbazen tamsalt n uqbal n yixeddamen ilmend n lixsas. Aya, iwakken ad yessixfef taεkemt yersen ɣef tenmehla-ines.
Ma d aḥric n uswir aεlayan, aseggas-a tasdawit n Tubiret ad tmager azal n 2000 yisdawiyen iwumi i d-thegga 2000 yimukan i leqraya d tnezduɣt.
M. Smail