Yessufeɣ-d, ussan-a kan, umedyaz Ɛezzun Ḥmed ammud-nniḍen n yisefra s tedrimt n tdukkla Itri Adelsan n Uqbu. Ad d-nesmekti d akken tesɛa-tt d lɛada tdukkla-a, tessaẓrag-d ammuden n yisefra, s uzwel “Tacemlit”, i yimedyazen i d-yettufraren deg umsizwer n tmedyazt i d-tettheggi deg tegrest n yal aseggas. Imi dɣa amedyaz Ɛezzun Ḥmed, mmi-s n Ayt Smaɛel, iḥella-d deg teẓrigt n yilindi amḍiq amezwaru deg temlilit-a n Uqbu, isaḥ-as-d, useggas-a, wammud s 68 n yisebtar d 30 n yisefra. D ammud n wawalen icebḥen wis sin i yesɛa tura, seld win i as-d-tessufeɣ tdukkla tadelsant Adrar n Fad deg useggas n 2016. Dɣa, tura akka, yettheggi umedyaz i kra n tuffɣiwin i tnezzut n ubuddu ara t-id-ijemɛen akked wid i t-iḥemmlen, ḥemmlen isefra-s.
M. K.