Aḥric 3 taggara
Yebda Geṭṭuc itekkes-d kra d tizzegzewt (ibawen, tajilbant, taga d wayen-nniḍen). Drus kan, yesla i lheffa n tteryel. Geṭṭuc yettergigi, yugad-itt, ur yufi d acu ara yexdem. Taswiḥt kan, yeẓra yiwet n tbeqlult n texsayt d tameqrant. Yeγza Geṭṭuc amdun deg-s, yeffer din. Ma d tacullidt-ines, iḍegger-itt γer yeγẓer.Tebda tteryel tettekkes ula d nettat ayen i as-d yeğğa Geṭṭuc. Drus kan, twala tacebbubt n Geṭṭuc teffeγ-d si tbeqlult n texsayt. Dγa truḥ, tsellef-as, teqqar-as: « Geṭṭuc ma d Geṭṭuc? Geṭṭuc ma d Geṭṭuc! (xlifa xelq-llah: awal-a fiḥel, neγ d acu ara tiniḍ?) Geṭṭuc, yettergigi, yeṭṭef tanzarin-ines d uqemmuc-is s yifassen-is. Yugad ad as-d yeffeγ kra unehhit ad as-tsel tteryel. Teččur tteryel iciwi-s s tzegzerwt, teṭṭef abrid-is γer uxxam. Nettat tetteddu tcennu: « A Geṭṭuc awah ad ak-ṭṭfen yifassen-iw ». Yurǧa Geṭṭuc drus, ur yesli i kra. Dγa, yerra inehhit, yeffeγ-d seg tbeqlulut-nni n texsayt. Yessuli-d taswalt-is seg yeγẓer, yeččur-itt s tzegzewt, yuzzel γer texxamt-is am yifeṭṭiwej. Yezwar tteryel. Tbedd tteryel γef tewwurt n Geṭṭuc, tessawel-as: « Geṭṭuc, wa Geṭṭuc, a-t-an wwiγ-d aṭas n tzegzewt, ldi tawwurt ad ak-n-fkeγ kra ». Yera-as-d Geṭṭuc: « Amek? Ha…ha… Nekkini zwareγ-kem, kkseγ-d akk ayen yelhan, ğğiγ-am-d ayen n diri. D nekki i yellan di tbeqlulut-nni n texsayt. D tacebbub-iw imi telliḍ tesselfeḍ. Fell-as i telliḍ tcennuḍ a taεeggunt ». Ihi, tteryel, irekkem wallaγ-is, tkerrec ifassen-is. Tettjellib, tessenccaw acebbub-is. Tuγal, tkerrec iles-is. Fγen-d ikuffiten seg uqemmuc-is, dγa temmut. Tenγa-tt lkeyya! Iruja Geṭṭuc, iruja ad as-isel, ulac. Dγa, yeṭṭal deg ceqqiqen n tewwurt, yeẓra-tt teẓẓel sdat n tewwurt n texxamt-is. Yeffeɣ-d Gettuc γur-s, yufa-tt d tidet temmut. Yezdeɣ Geṭṭuc axxam n tteryen. D ameqqran, yerna deg-s yella kra yellan yeḥwajǧ Geṭṭuc i tmeddurt-is.
Akli Azwaw