Akken i tuɣ tanumi tddukkla tadelsant Tigejdit n AT Zɛim, i iqedcen deg taddart n Atn Zɛim, i d-yezgen deg tɣiwant n Lemɛatqa, s leqdican-is yemgaraden, tikelt-a, ad suddes Tazrigt tis 8 n tmeɣra n tzemmurt, ara yilin seg 21 ɣer 24 Meɣres 2018.
Aya, ad yili i lmend n usfugel n Wass aɣelnaw n useklu d Wass agraɣlan n teẓg, anda yettuɛeggen, ad ttekkin ugar n 80 n yimsikniyen ara d-yasen seg rebɛa n tɣumar n tmurt. Aseggas-agi, ad yili usentel n tmeɣra ɣef tɣara n zzit n uzemmu « gGar tmuɣi tussnant d tmuɣli tadelsant n tmetti taqbaylit ». Ma nesemres gar snat n tmuɣliwin ad naf amgarad meqqer gar-asent. Dɣa tazrigt-agi, d tagnit i usqerdec n temsalt n tɣara n zzit, d useqreb n tmuɣliwin gar sin n yidisan i lfayda n tdamsa n temḍiqt n leqbayel. Deg tmeɣra-agi, ad ilin aṭas n wudmawen, ama d imussnawen n uḥric n tfellaḥt, ama d ifellaḥen, srabes n tfellaḥt, imesdawiyen, imɛelmen n tesyar n uzemmur d waṭas-nniḍen. Heggan-d yiɛgalen n tddukkla yiwen n wahil s wazal-is i lemend n tmeɣra-agi n tzemmurt. Gar wayen yettwajerden deg waḥil, ad naf timsikniwin d lbiɛ n zzit n uzemmur n tɣiwant n Lemɛatqa, n tɣiwanin n ugerzu n Tizi Uzzu, Bgayet, Tubirett d Bumedes. Ad ilint, diɣ, timzikniwin n yisufar yetabaɛen ɣer lɣella n uzemmur : legric, abaliɣ, aɛbuẓ, amurej, tisnatin d waṭas nniḍen n yisufar. Am wakken ara ilint temsikniyin d lbiɛ n yisufar-nniḍen ladɣa tazart ( iniɣman- iḥbuben), tament akked d tid n temzikniwin d lbiɛ n tesnayin n uzemmur, tisyar n uzemmur, asewwi n Leqbayel, afexxar n Lemɛatqa, lfeṭṭa, tiqneddyar…atg. Zyada êf wanect-a, ad ilin yisaragen ɣef tɣara n zzit n uzemmur, gar tmuɣli tussnant d tmuɣli tadelsant, ɣef ttawilat n usegmu n uḥric n uzemmur, amḍiq n zzit n uzemmur, ssuq aɣelnaw deg tdamsa n temḍiqt n Leqbayel. Ad ilin yisaragen-agi s tallelt n yimussnawen n uḥric n uzemmur, anda ara yilin imesdawiyen n Mouloud Mammeri, ITFV Sidi Aiche, CNCC El Harrache, SRPV Draa Ben Khedda, ITMAS Boukhalfa. Ad ilint, daɣen, tamhalin n tuzzut, n ufras d uleqqem n uḥeccad ( aẓebbuj) akked tuẓḍa n uzemmur s tarrayt taqburt, asewwi n sabun. Leqdic meqqren ara yilin deg tegnit-agi, anda ad d-mlilen akk wudmawen n uḥric n tfellaḥt i usqerdec n temsal yeɛnan yal yiwen, ama d iɣeblan, ama d timuɣliwin i unegmu n uḥric n uzemmur n temḍiqt n leqbayel. Tameɣra-agi i d-yettilin yal aseggas deg taddart n At Zɛim, d tajmilt i yiwen gar yisekla igejdanen n tuddart deg temḍiqt n leqbayel d tmura n yilel agrakal. D azamul n Yimaziɣen seg zik ar tura. Assuddes n tmeɣra-agi, yebda deg useggas n 2009, aṭas n umaynut i d-tewwi i lefayda n uḥric n uzemmur deg temḍiqt n Lemɛatqa, imi yal tikkelt yettili-d uwellah d usemres n ttawilat atraren, d tmussniwin tussnanin deg unnar n uḥric n uzemmur.
Ali Zalouk