Ilul Rachid Alliche ass n 7 yebrir 1953, deg taddart n Taguemount Azouz yetabaɛen ɣer tɣiwant n Ait Mahmoud deg Ath Douala. Yelmed deg yiɣerbazen n Tizi Uzzu, syin akkin yewwi-d agerdas DES n tfizikt seg tesdawit n Lezzayer. Iruḥ ɣer tmurt n Fransa, ikemmel dinna almud-ines di tsekla, dɣa yewwi-d agerdas n DEUG n tsekla, seg tesdawit n Lyon n tmurt n Fransa. Tin ɣur-s, yuɣal yesɣer dinna tasekla deg tesdawit-agi aṭas n yiseggasen. Ur d as-tettunfek ara tegnit i wakken ad yelmed tutlayt n tyemmat akken ilaq lḥal, deg yiɣerbazen d tesdawit n tmurt, maca yeɣra i yiman-is ɣer tama n wayen i d-yelmed ɣer uselmad amezwaru n tamziɣt Mouloud Mammeri. Rnu ɣer lebɣi-ines i tmeslayt-is tanaṣlit taqbaylit, d ayen i t-yeǧǧan ad yaru s teqbaylit sin wungalen s wazal-nsen. Amezwaru d “Asfel”, i yura deg useggas n 1981, aseggas kan mbeɛd Tafsut n yimaziɣen 20 yebrir 1980. Xemmsa n yiseggasen kan ɣer sdat, dɣa deg useggas n 1986, yerna yessuffeɣ-d ungal-is wis sin “Faffa”. Yettuneḥsab Rachid Alliche, d aneggal wis sin s tmaziɣt seld Belaid Ait Ali, yuran “Lwali budrar”. Yettuneḥsab daɣen d ameɣnas n tutlayt tamaziɣt, imi deg lawan ideg tettwagdel tmaziɣt deg tmurt n Lezzayer, Mass Alliche, mačči kan yettmeslay-itt neɣ yettaru-tt i yiman-is, maca yessuffeɣ-d sin wungalen s tmaziɣt. Yennuɣ ɣef yidles d tutlayt tamaziɣt, ɣer tama n wayetma-s seg useggas n 1970 armi d asmi yemmut. Yefka-as-d i tsekla tamaziɣt udem-nniḍen, mbeɛd mi tella d timawit, tuɣal tedda deg ubrid n tira. Yexdem daɣen d aneɣmas deg rradyu tis snat, anida i d-yettawi tidwilin i warrac imecṭaḥ ladɣa wid ur nessin ara ad ɣren. Yufa-tt d tagnit i wakken ad ikemmel amennuɣ-is s wawal ɣef yidles amaziɣ s umata. Ma nger tiṭ ɣef wayen yettwaxdamen fell-as, ad naf drus maḍi imi netta aṭas i d-yefka i tsekla tamaziɣt s wuzig d tutlayt tamaziɣt s umata. Aṭas n tezrawin tisdawanin yettwaxdamen ɣef wungalen-is, d wayen i d-yeǧǧa. Deg useggas n 2014, tisebdit takanadit n tamaziɣt, tesnulfa-d arraz n Rachid Alliche i wungal ifazzen. Am wakken daɣen i d as-tettuɣal tejmilt deg tɣiwant-is si teswiɛt ɣer tayeḍ. Yewweḍ leɛfu Rebbi ass n 18 meɣres 2008 deg Lezzayer tamaneɣt, di leɛmer-is 55 n yiseggasen kan. Ass-nni lḥed iɛeddan i wweḍen 10 n yiseggasen ɣef tmettant-is, ulamma yemmut maca leqdic-is mazal-it yedder, ulac win ara d-imeslayen ɣef wungal amaziɣ ma ur d-yeddi ara yisem-is. Ɣer taggara, am wakken qqaren: “Ulamma yeǧǧa-aɣ, yeǧǧa-aɣ-d”.
A. A.