Deg usamar n Bgayet, ar tura mazal ur temmiɣ tmeṭṭut deg umussu asdukklan. Am deg tɣiwant n Ayt Smaɛel, i yeggugen s wazal n 60 n yikilumitren ɣer Unẓul-asamar n Bgayet, ur tnuḥ ulamma d yiwet n tddukkla i selḥayent tlawin akken ad qedcent ama ɣef wayen i tent-yeɛnan, neɣ deg usnerni n tzemmar-nsent deg taɣulin yemgaraden. Ula d aselway amaynut n tɣiwant n Ayt Smaɛel, Mass Sadeq Rebbaɛi, yewwi-d deg wahil-is n tefranin yezrin kra n tektiwin i usebɣes n teḥdayin, ladɣa, deg uɛeddi ɣer tigawt n usnulfu n tddukkla, d ulday n ubrid i tlawin-nniḍen akken ad kecment deg umussu asdukklan. Imi, ugar n 13 n tddukkliwin i iqeddcen imir-a deg Ayt Smaɛel, war ma tban-d ula d tili n tmeṭṭut deg-sent. D acu, akka tura dɣa, ttheggint kra n tlemẓiyin ad zdint d agraw i usnulfu n yiwet n tddukkla n tlawin n Ayt Smaɛel. Ma nsenned ɣef teɣbalut-nneɣ i iqerben ɣer terbaɛt-a, ad yili yiswi agejdan n tddukkla-a ara d-ilalen, d aseḥbiber ɣef yizerfan n tmeṭṭut s umata, akked uheggi n warmuden i yerzan lxalat, timetti d yidles. « Nɛewwel tikkelt-a s tidet ad d-nesnulfu tiddukkla tamenzut n tlawin n Ayt Smaɛel. Mazal kan ad yamed lqidar n tɛeggalin i ilaqen akken ad nekker i umecwar wis sin n uxdam n lekwaɣeḍ. Nessaram ad nessiweḍ ɣer lebɣi s tekti-a tamaynut ». I d-tenna yiwet seg tid i d-yettheyyin asnulfu-a. Ahat d asurif amenzu ara yeǧǧen tameṭṭut n Ayt Smaɛel, ad d-teffeɣ seg umeslay-nni n nnig ukanun, akken ad temmeslay ɣef usnerni n tmetti d tifin n tifrat i wuguren-is. D ayen ara yesǧehden ugar amussu asdukklan, s yisenfan-is yemgaraden, deg temnaḍt-a tamsedrart.
M. K.