Tettwaseqqef, ddurt iɛeddan deg Ayt Smaɛel, teẓrigt tis 16 n tfaska n tmedyazt tamaziɣt i yellan d tajmilt i Dda Lmulud At Mɛemmer. Deg teɣzi n sin n wussan, ɛerḍen yimheggiyen, ad smersen s wudem yelhan ahil n tedwilt, ulamma addad n tegnawt ixesren, yella-d cwiṭ mgal aya. Armi dɣa, ula d taldayt tunsibt n tfaska, i yellan tetturaǧu i amhad, tettawaselḥem armi d ass n sem ɣef 10:00 n tnezzayt. Deg wahil amatu, tella-d deg wass amezwaru tɣuri n yibruyen seg tullisin i ikecmen deg umsizwer-a, deg teẓrigt-is tamenzut, am wakken ḥeḍren yinebgawen n Udrar n Fad i tmezgunt n terkeft n Umezgun Kateb Yasin n Tizi Uzzu. Smeḥsen daɣen i sin n yisaragen; yiwen ɣef Lwennas Meɛtub sɣur Mass Hebbac Yasin, wis sin, metwal iḍ, ɣef tutlayt d tewsatin n tira n Dda Lmulud, sɣur Massa Yaci Nasira. Azekka-nni sed, aṭas n tedwilin n tmenna n yisefra i iɛeddan, ttuɣalent-d seg wakud ɣer wayeḍ. Yal amedyaz yeɛreḍ ad d-yessiweḍ s yiḥulfan ayen yelhan ɣur-s d asefru. Deg wass-nni, temmug-d tmezgunt i d-tessenɛet terkeft n tddukkla tadelsant Adrar n Fad. Akken armi d tameddit, yewweḍ-d wahil n teẓrigt-a ɣer taggara-s. Degmi ulin yiɛeggalen n tesquma s azayez akken ad d-berḥen s yigmemaḍ unsiben n yimsizwar n tmedyazt d win n tullisin. Dɣa, saḥen-d yimeḍqan imezwura deg tmedyazt, i Mass Saleḥ Luni s warraz amezwaru, Masen Muḥend Arezqi Buɛam d Masi Arib s warraz wis sin, d Mass Muḥend Babu s warraz wis kraḍ. Yettunefk daɣen warraz n tmeṭṭut i Crif Nesrin, win n yilemẓi i Meḥmud Badis, win n yimezgi i Awcic Muḥemmed, win n umɣar i Bakuc Ceɛban. Deg umsizwer n tullisin, seld amcawer n tesqamut, yettunefk warraz i Wakli Muhubi.
Nnan-d:
Saleḥ Luni, arraz amezwaru deg tmedyezt
«Ahat leqdicat yecban wigi n Udrar n Fad d tiririt i wid i d-yeqqaren taqbaylit d timawit kan ! Ulac ɣur-s asekkil, ulac ɣur-s agemmay. Neɣ mazal-itt kan d tantala. Γur-neɣ nekni d tidukkliwin yecban tagi i d takadimit-nneɣ. Ma d arraz, ur i yi-yecqi ara nekk weḥd-i; d Taqbaylit i t-yewwin».
Masi Arib, arraz wis sin
«Ferheɣ atas atas s warraz-a, imi d tikkelt tamenzut ara ttekkiɣ deg tfaska n tmedyazt. Ferheɣ imi wwiɣ arraz-agi nekk d amecṭuḥ. 18 n yiseggasen kan i sɛiɣ ».
Akli Muhubi, arraz n tullist
«Mi sliɣ s tddukkla tadelsant Adrar n Fad tberreḥ-d s temsizelt n tullisin, deg teẓrigt-is tamenzut, εewleɣ ad kkiɣ am nekk am wiyaḍ. Maca ur rǧiɣ ara ad d-ufrareɣ gar yimenza. Mi yi-d-yewweḍ yisalli ncerraheɣ nezzeh, yerna d ayen i yi-d-yernan tabɣest i wakken sya ɣer sdat, ad fkeɣ ayen kesbeɣ
d tamussni ».
M. K.