Abeddel yekcem deg tikli tagamant n tudert, daymi ddunit tezga tettemhaz, tettbeddil. Ayen akk yettidiren deg lqaɛa, yewwi-d ad yekcem deg umussu n tudert, war leɛtab, war amennu&gamma,; maca s lebγi, acku ddunit s timad-is d abeddel. Amussu n tudert, yettawi-d yid-s tanufli, isenfaren imaynuten, asirem d tirga yettuγalen d tilawt. Abeddel d tamuγli tamaynut, d tikli tamaynut deg ubrid amaynut i ilaq ad neḍfer akken ad nheggi iman-nneγ i tudert n uzekka, tudert n tumert d liser. Ma nebγa, ayγer ala ! Amdan, d ayen i yettxemmim. ‘’Akken i yettxemmim deg wallaγ-is i yettidir ula d tudert-is’’. Anamek n waya: amdan d lemri n wayen akken i yettxemmim. Tikli-s akked tigawin-is d lγella n uxemmem-is. Am yimγi ara d-yeffγen seg tzerraɛt, war nettat, ur yezmir ad yili. Ttlalent-d tigawin-nneγ seg tzerraɛin tuffirin n yixemmimen-nne&gamma,; yerna ur zmirent ara ad ḍrunt war tizerraɛin-a. S wakka, yal tikli d yal tigawt ara yeg umdan, d afaris n uxemmem-is. Tigawt, d tajeǧǧigt n uxemmem, tumert akked wurrif d igumma-ines. S wakka, amdan iγellet igumma ẓiden neγ rẓagen n wayen akken yeẓẓa s uxemmem-is. Nekkni akk d tugna n yixemmimen-nneγ. Ayen akk nedder d wayen ara nidir d nekkni i t-yebnan s tektiwin-nneγ. Ma yella nettxemmim γef wayen n diri, leɛtab d lmerta ad aγ-ḍefren akken i ttemseḍfaren wass d yiḍ, ur aγ-xeṭṭun ara. Ma yella neẓẓa deg-neγ axemmem yelhan, yufraren, talwit d tumert, ad d-neγlen fell-aγ am udfel-nni acebḥan, mi ara d-yeγli γef tmurt, ad yesfeḍ akk ayen yellan berrik. Ihi, d amdan i ibennun u d netta i yessedramen tudert-is s uxemmem-is. Kra ur yelli s lqeḍra neγ kan akka s ugacur. Deg tebḥirt n yixemmimen-nneγ i d-yesnulfuy imrigen swayes ara yeγḍel tudert-is, maca dinna diγen i yezmer ad yebnu iγaladen iseḥḥan ara iḥudden γef ddunit-is, u ad yeḍmen i yiman-is tudert n talwit, n rrezg d tumert n lebda. Tasarut, ha-tt-an gar yifassen-nwen, d axemmem-nwen. Ma tebγam ad ffγent tirga-nwen, ad tawḍem γer yiswan-nwen, ili-ken d ufraren deg yixemmimen-nwen, ad teǧǧuǧeg tudert-nwen. Xemmet, rǧut, sirmet ayen tebγam, ad tawḍem lebγi-nwen.
Larbi Yahioun