Am wakken i d-nberreḥ s ttiɛad deg yisebtar-a n Uɣmis n Yimaziɣen, tella-d taggara n meɣres iɛeddan deg taddart n Yiburayen, taɣiwant n Tifra, yiwet n tmeɣra d tameqqrant n uderyis, i yuɣalen tura d ansay seld sebɛa n teẓrigin-aya segmi tebda. Deg tfaska-a, tuɣal dɣa tejmilt i Ɛetmani, yiwen seg yizamulen n tezlit tamḥaddit tazwawt, ideg i as-yettunefk ubernus d yiwet n tfelwit d tageɛmirt. Nesteqsa kra n yinaẓuren i iḥeḍren i ttiɛad-a, gar-asen Ɛetmani i terza taluft, ha-t-a wacu i aɣ-d-nnan:
Ɛetmani: «Ass-a ɣur-i, d yiwen n wass yeččur d tadfi d tumert, gar wid-iw. Kecmeɣ-d ɣef ddemma n waya seg Fransa, i wudem n yirgazen-a i d-iheggan ahil fell-i. Ad snemreɣ tiddukkla Itri Iburayen akked tid iqeddcen i yidles-nneɣ. Aql-I, yeɛjeb-iyi lḥal maḍi seg tigawt-a n tayri d leqder i yi-xedmen».
Ḥasan Aḥres: «Tamezwarut, ḥeḍreɣ ass-a s waɣan akked leqder, i tejmilt i terra tddukkla Itri Iburayen i Dda Ḥemmic. Ugar mi aql-it d amdakkel, Dda Ḥemmic, d yiwen i yekkin s tehri deg lebni n ufakan n tezlit taqbaylit. Imi yettwabeddel wahil n tfaska deg teswiɛin tineggura, terra-yi tmara ad beṭṭleɣ asihar wayeḍ akken kan ad iliɣ ɣer yidis n Dda Ḥemmic. Iban d ayen iɣef ur ndemmeɣ. Ad as-yesseɣzef Rebbi di leɛmer, acku, mi ra nsel i yiseɣrez-ines aneggaru, neḥsa yezmer ad yernu ad d-yefk i tezlit taqbaylit».
Idir Akeffadu: «Nerra tajmilt i yiwen seg yinaẓuren s i d-kkreɣ nekk d ameẓyan. Ḥemmleɣ aṭas Dda Ḥemmic, ttqadareɣ-t. Yiwet n teqsiḍt, rradyu-inu tamenzut uɣeɣ-tt-id si lǧib-iw mi lliɣ d acawrar. Mi tt-ldiɣ, tmuger-iyi-d yiwet n tezlit i yuɣalen ɣer sdat gar tezlatin-iw timxeyyrin; ayen d tizlit-nni yettwassnen «Trebba-yi-d lmeḥna». Seg wass-nni, werǧin ḥebseɣ aḍfar n Dda Ḥemmic.
Ṭaleb Ṭaher: «Nella merra dinna, ad neḥḍer i tejmilt-a yettwaklalen n Ɛetmani. Yerna wazal n tejmilt-a meskud mazal-it yedder unaẓur. Ur nezmir ad d-nebder deg yiwen n wawal ayen i d-yewwi Ɛetmani i tezlit taqbaylit. Ttmeslayen fell-as yiqeddicen-ines».
M. K.