Deg wussan-agi iɛeddan, i d-yeffeɣ wuṭṭun wis 14 n tesɣunt taseklant tamaziɣt “Tamaziɣt Tura”, i d-yessizrig Useqqamu unnig n timmuzɣa (HCA). Uṭṭun-agi wis mraw d ukkuẓ, d uzzig i umussnaw Mulud Mɛemmeri, i lmend n tesmiḍent (100 yiseggasen) n tlalit-is 1917-2017. D tasɣunt i d-yettefɣen yal aseggas, s yisental yemgaraden. Ma d uṭṭun-agi uzzig, yewwi-d awal deg yal aḍris neɣ amagrad ɣef tudert d yimuhal n umaru d uneggal mucaɛen di ddunit merra, wagi d Mulud Mɛemmeri. Ma nger tiṭ ɣer ugbur n tesɣunt-a, ad naf deg-s tisuqqilin seg tefransist ɣer tamziɣt, tizrawin yettwaxdamen fell-as, tijmilin, isefra, tidiwenniyin-is… atg. Akk iḍrisen yellan deg-s, ttwarun s tmaziɣt sɣur iselmaden n tesdawit, isdawanen, imura d yimedyazen imaziɣen. Ma nsuk tiṭ gar yisebtar n wuṭṭun-agi wis 14, ad naf deg yixef amezwaru tasleḍt n kra n yisental iɣef yura Mulud Mɛemmeri, gar-asen; tameṭṭut, timawit, asiskel, aḥiwec n yidles amaziɣ, tamussni… atg. Ma deg yixef wis sin, ad t-naf d aḥric n tsuqqilt n 5 yiḍrisen yura netta s tefransist, ttwasuqlen-d ɣer tmaziɣt, gar-asen; “La traverée” , “Le sommeil du juste”, “L’olivier”… atg. Deg yiɣef wis tlata, ad naf deg-s tijmilin i d-as-yuɣalen sɣur yimura d yimedyazen. Am wakken daɣen ara d-nmagger tidiwenniyin-is s tmaziɣt, ad d-naf diɣ tlata n tezwarin (préfaces) yura netta s tmaziɣt. Deg taggara, ad nesmekti kan belli tasɣunt-agi taseklant “Tamaziɣt Tura”, ur tettnuzu ara deg tnedlisen, d afraq i tt-yettefraq Useqqamu unnig n timmuzɣa, i tt-id-yessuffuɣen yal aseggas. Uṭṭun-agi uzzig n Mulud Mɛemmeri, yella-d deg lmendad-is Mass Said Chemakh.
Adaoun Abdelghani