Ssebt-agi sdat-nneɣ 05 mayyu 2018, ad d-tili tmeɣra n ccna n tallelt deg Uxxam n yidles Taous Amrouche n Bayet, i lfayda n ucennay d unaẓur Hafid Amour, i yudef waṭṭan n wul acḥal-aya. Ilaq ad as-xedmen tamhelt (opération) ɣef tabɛa n wul, i wakken ad yizmir ad ikemmel tudert-is am netta am wiyaḍ. Mebɛed mi wallan yimezdaɣ n lwilaya n Bgayet akked yimeddukkal-is inaẓuren belli ur yezmir ara i tamhelt-agi i d-yesqamen ayen din n yidrimen, dɣa gren-d tiɣri i yimdanen s tmeɣra-agi n ccna ara d-yilin i lmendad-is ass n ssebt. D tameɣra ara d-yilin deg tzeqqa tameqqrant n Uxxam n yidles Taoues Amrouche, ɣef 14h00 n tmeddit, ma d asenzi n tewriqin n unekcum, ad yili ɣef 09h00 n ssbeḥ alamma d 12h00 n uzal, ma d azal n unekcum ad d-yili s 400 Da. Yetturaǧu ad cnun deg tmeɣra-agi aṭas n yicennayen yecban; Boudjema Agraw, Ouazib Mohand Ameziane, Azifas, Ghanou Abdjaoui, Loualia Boussad, Massi Benadji, Rachid Ferhani d wiyaḍ. Ɣer taggara, ad d-nesmekti s yidisan i d-iheggan leqdic-agi ameqqran, gar-asen; Aseqqamu aɣerfan aɣiwan n Bgayet, Tanmehla n yidles n lwilaya-agi, Axxam n yidles Taoues Amrouche, Ddiwan aɣelnaw n yizerfan n umeskar (ONDA).
Gh.A.