Rreḥba n udlis i warrac deg tezrigt tis 2, ad tili gar 5 d 6 tuber i d-iteddun, deg taddart n Uɛfir deg tɣiwant n Bujimaɛ, ass n sem akked sed-agi sdat-nneɣ 05 d 06/10/2018, ad ilin yimezdaɣ n taddart n Uɛfir deg ttiɛad u deg yirebbi n yidles s umata d udlis s wuzzig. Mebɛed tazrigt tamezwarut n 2016, iɛeddan deg tegnatin igerrzen, tefka afud meqqren i tddukkla tadelsant “Amnir” n tama n Uεfir n Bujima&epsilon,; i wakken ad suddsen tazrigt tis snat. D ashier i d-yettwaheggan s tallelt n tenmehla n yidles n Tizi Uzzu, tin n usegmi akked Useqqmu aɣerfan n lwilaya (APW) n Tizi Uzzu. Ad yili leqdic-agi adelsan deg uɣerbaz amezwaru “Addar Belaid” yellan deg tama-agi n Uεfir, anda i txeddem ddeqs n yirmad tddukkla-agi tadigant. D rreḥba n udlis deg tezrigt-is tis snat, ideg yettturaǧu ad ttekkint aṭas n tezrigin, ara ixedmen timsikent s usenzi, am wakken daɣen, ara yilin imyura ara yessenzen s ubuddu idlisen-nsen, s tutlayin yemgaraden, ara d-yerzun seg waṭas n tamiwin. Imsuddsen n rreḥba-a, heggan-d leqdicat-nniḍen ara yilin deg wahil, anda ara naf sin n yisaragen, yiwen ɣef usizreg n udlis n ugrud, wayeḍ ɣef tfelsafit n ugrud. Am wakken daɣen, ara naf isikwan (ateliers) n tira d usuneɣ akked tɣuri, ad tili diɣ, tɣuri n yisefra d wayen-nniḍen. Bɣan yiεeggalen n tddukkla-agi Amnir, ad ẓẓun tikti n udlis d tayri n tɣuri ɣer warrac imecṭaḥ, d asebɣes daɣen i yimura yettarun i tsuta-agi. Ma ɣer taggra n ttiɛad, yetturaǧu ad fken arrazen d igerdazen n usebɣes i warrac ara d-yufraren deg kraḍ n temsizliyin: ama d tira, ama d taɣuri, neɣ d unnuɣ.
A. A.