Aḥric 1u
Tamacahutt agi, d tamacahutt n yiwen yilat neɣ acacfal (géant), yettwassnen di yal timura n umaḍal. Qqaren-d wid i t-iwalan, mi ara d-yelḥu deg tlemmast n yilel, iḍarren-is ttrusun ɣef lqaɛa, maca aman ur d-ttawḍen ara ɣer tuyat-is. D anegmar bu lhiba, yeẓwer deg ssyaḍa, ur yettagad lewḥuc n teẓgi, s yidmaren i yettqabal, ur yettuɣal timendeffirt. « Amnir » i d ism-is. Ilul-d deg unebdu, seg uglim n uzger i yenṭel ugellid baba-s, deg uḥriq s ddaw wakal ur nttak igumma. Yeswa-t s yidammen n yizem, ur t-id-rba tmeṭṭut, ur yessin tilqeq akked uzuzzen n tyemmatt, ur d-yekker s tmucuha sdat lkanun. Ass-nni i deg yunag ɣer tmurt-nniḍen, yezger izuɣar, idurar, akked lebḥur. Yewwi iberdan yennḍen, yeẓra-d tiẓegwa yessewḥacen, yelḥa ussan d wuḍan, armi yewweḍ ɣer yiwet n tgelda ibeɛden. Yufa-d dinna tulawin maci d kra. maca ul-is ɣer tgeldunt i imal. Mi yessuter afus n teqcict i baba-s, agellid yenna-as deg wawal-is : « Sliɣ la heddren medden, neṭṭqen-d ula d iɣersiwen, nnan-d kečč d anegmar n yizmawen.Tessutreḍ-d yell-i i ɣef ttnaɣen yirgazen. Ha-tt-an d zwaǧ-ik maca wissen, ma tuklaleḍ mummu n wallen… ». Inṭeq-d urgaz yenna : ‘’Ay agelliḍ ameqqran, ad ak-id-yaweḍ ayen i ak-yehwan, creḍ ad ak-t-id-awiɣ ula d adfel yerɣan ». Ixemmem ugellid yenna-as : « Maci d adfel i yi-icuɣben, i yi-iɣaḍen d wid yemmuten, yečča-ten waɣzen. Ruḥ ma tzemreḍ ad-t-id-tqabled s yidmaren, ad ak-heggiɣ tameɣra s yiḍebbalen ». Agellid yenna, argaz yesla, ur yewwi la učči, la aɛewdiw i as-d-fkan, ala adebbuz-ines, yerna yesbur aglim n yizem, yedda. Ur ɛeddan ara kraḍ n wussan, yuɣaled. Ar ass-a, yiwen ur yeẓri amek yenɣa waɣzen, maca yewwi-d acciwen-is deg culliḍ-is, yessers-iten sdat ugellid. Agellid, ibeddel wudem-is, ur yurǧi ara ad yuɣal urgaz d amuddir, yenna-as : « Ih, ih, yirbeḥ a mm-i », meɛna mačči d tameɣra i as-d-ihegga i uḍeggal, d acangal am win ttheggin i yir acengu …tettkemmil
Seg imyura.net