Seld rray i ddmen yiɛeggalen n taddart n At Zɛim, yetabaɛen ɣer tɣiwant n Mɛatqa, ɣef utteki deg temsizzelt Aissat Rabah n taddart zeddigen n tmurt n Leqbayel. I lmend n waya, ihi, tessuddes-d teseqqamut n taddart s tallelt n yimezdaɣ, ass n sem iɛeddan, 16 deg waggur n unbir 2018, yiwet n temhelt n usizdeg d ugerrez n taddart. Fkan-d yimezdaɣ n taddart afud meqqren ɣer yidis n yiɛeggalen n teseqqamut deg temhalt-agi n usizdeg, anda ssawḍen ad sizedgen amur meqqren n tregwa n ubrid ameqqran icudden talemmast n tɣiwant ɣer taddart n Tizi Tzeggart, abrid i d-yeggran deg yir liḥala seld iḥemmalen n waman i d-yewwten s ṭṭaqa deg ddurt iɛeddan. Ɣas ma asizdeg n tregwa d ṭrufat n yiberdan, d timsal yeɛnan srabes n tɣiwant, maca seld lexṣas n yixeddamen deg tɣiwant, xedmen-t yimezdaɣ s lḥir d tebɣest. Segmi yuli wass, beggsen yimezdaɣ ɣer umahil-a, yal wa s wayen i yezmer : wa s yiɣallen, wa s ttawilat n usiweḍ, wa s tallelt n tedrimt i wakken ad teddu temhelt akken iwata. Ula d iɛeggalen n Useqqamu aɣerfan aɣiwan n Mɛatqa, fkan-d afus n tallel deg leqdic-agi, s usemres n ttawilat n usiweḍ n yiḍuman. Yebda leqdic n usizdeg d uqeɛɛed n tregwa d leryuf n yiberdan seg tazwara n taddart : seg umḍiq iwumi qqaren Amalu n Ccix alamma d anda tekfa taddart, ugar n 25 n yikamyunen n yiḍuman i d-yettwakksen seg tregwa n taddart. Akkal-a akked yiḍuman yemgaraden, ɣelqen yakk tiregwa d iɣezran n taddart. Ad yettili leqdic-agi n usizdeg d uqeɛɛed yal taggara n ddurt sɣur imazdaɣ d yiɛeggalen n teseqqamut n taddart. Iswi n temhalin yecban tigi, d awenneɛ n tudert n yimezdaɣ, d aseḥbiber ɣef twenndtṭ d ugama. Rnu ɣef waya, d axlaq n lḥir d ifadden ɣer yimezdaɣ. I wakken, daɣen, ad ḥerzen amḍiq deg umeḥzizwar deg temsizzelt n taddart zeddigen deg tmurt n Leqbayel.
A. Z.