I tikelt-nniḍen, ass n 10 di furar, inelmaden n tesdawit Mulud Mεemmri ffγen-d s abrid akken ad d-beggnen lγiḍ-nsen γef wuguren i d-ttemlilin ladγa di tmezduγin-nsen. Tikli bdan-tt-id di 1500 yid-sen si Lwad Σisi, anda llant tmezduγin-nsen. Wwin abrid aγelnaw qbala γer lwilaya anda i d-yella yiwen ibeddi, syin d iγimi γer lqaεa zdat n tewwurt n lwilaya imi di tazwara imḍebbren n lwilaya nnan-asen-d ulac lwali. Deg yiwen ulγu i d-γran din uddren-d aṭas n wuguren i d-yezgan d iεewwiqen di leqraya-nsen : « imḍebbren-nneγ snen ad ad d-banen waεrit zdat n unelmad, n uneγmas neγ sindika, acu kan ttsamaḥen i iḥeqqaren d imcumen… » Gar wayen i ten-iceγban s waṭas, ad naf d tamsalt n tεessast n tmezduγin-a imi εlaḥsab n Yacine Aissiouane, yiwen i yettmeslayen s yisem n tesqamut n yinelmaden : « win tufiḍ ad d-yekcem γer daxel n tmezduγin-a, d imdanen n berra i yellan s waṭas wala wiyiḍ ; ad tweḥceḍ azal qayli, tamsalt tεelleq acḥal d aseggas-aya tura. Timezduγin cbant igran ; ulac lḥiḍ,; ulac ẓẓerb… ». Am wakken i aγ-d-yenna diγ,; ha-t-an ad ibedd zdat n ccreε netta d sin-nniḍen γef yiwet n temsalt i yebdan seg useggas n 2008. Ma dayen i d-yettuγalen kan deg yimawen n yinelmaden-a, d lḥif i ttidiren yal ass, γef wanect-a qqaren : « 100 yimelyar n dular, anelmad yeṛwa lemṛar.»
I usmekti, tikelt iεeddan, ṭṭfen yinelmaden DOUC iḍ kamel di tmezduγin n Buxalfa.
Ma d awal yezdin akk medden d wa : « iwacuγer anect-a di tesdawit ? »
Lhocine Ourezki