«Ilaq iselwayen n tɣiwanin ad ilin d imɛiwnen-nneɣ iwakken ad nessiweḍ s aseddu n yisenfaren. Snat n tamiwin-a ma yella ddant afus deg ufus ad ilint deg lmendad ama i yimezdaɣ ama i tmurt sumata. ” S wakka i yebda awal-is yimḍebber amaynut n Tubiret Mass Mouloud Cherifi lawan n beddu n lecɣal n useqqamu aɣerfan n twilayt i yebdan ass n larebɛa iɛeddan. D timlilit d-ijemɛen tiget n yimḍebbren deg yiḥricen yemgaraden iwakken ad sqerdcen timsal yerzan isenfaren n unegmu d uheggi n tedrimt iwulmen i lecɣal nnipden. Dɣa d tagnit I ifures lwali iwakken ad d-yini “ad kemmleɣ deg ubrid I d-yenjer yimḍebber yellan yakan da, maca ad ssugteɣ tufɣa ɣer unnar iwakken ad d-zreɣ s anda ddan yisenfaren yebdan. ” Ssakin, yella-d wawal ɣef uktazal n temlilit yezrin anda tasqamut yettusbedden tefka-d akka kra seg wayen I texdem. Taneqqiṭ tamenzut d tin yerzan asufeɣ n tedrimt n yisenfaren igellen acḥal d aseggas, d uɛiwed n useddu n yisenfaren nniḍen. Tasqamut-a, tenna dakken “ ilmend n uwellih gar taɣlifin wis 933 n waggur n yebrir n useggas ideg nella, aqel-aɣ nessewjed tadrimt iwulmen I tiɣin n ttawilat n usiweḍ I tuḥwaǧ twilayt. Am waken daɣ I d-nelha s usenfar yerzan aɣawas n tikli daxel n temdint d uheggi n xemsa n yisebdad. ” Awal yezzi daɣ deg temlilit-a ɣef ttjara mebla ttriḥ yuɣen aẓar deg tmetti, iḥuza akk timnaḍin n tmurt. Ɣef aya dɣa, imḍebbren n tesqamut sukken-d akka tiṭ ɣef wayen yettaxedmen uqbel am uḥareb n leswaq-a yettwasbedden di yal amkan, ula ɣef yiri n ubrid aɣelnaw. Wid yettmeslayen s yisem n tesqamut fkan-d yiwen n umḍan yewwḍen ɣer 320 n yimessenza iwumi gan amkan deg leswaq yettwasnen, yesɛan ttriḥ. Seg tama nniḍen, timlilit-a tezzi lwelha-s ɣer tedrimt ara teḥwiǧ twilayt ilmend n useggas i d-iteddun. Ɣef waya, yella-d umwata ɣef 1. 703. 903. 470 n yidinaren, d ayen yessawḍen s asenqes n userref s wazal n 18% ɣef useggas yezrin. D yiwet n tedrimt ara yettuferqen ɣef waṭas n yiḥricen. Yella-d wawal d usqerdec s telqayt iwakken ɣer taggara n temlilit yettwaqbel ufraq-a n tedrimt s-ɣur waṭas n yiɛeggalen n usqamu n twilayt mi akken wid yellan deg tama nniḍen ugin ad ttikkin deg ufran.
Smail. M