Yiwen n yinaw i d-yettuɣalen yal tikkelt deg yisaragen i d-yettilin ɣef unegmu deg ugerzu n Tizi Uzzu, wagi d anezruy n temḍiqin (désequilibre régional).
Dɣa ma nessemres kan gar tɣiwanin n ugerzu, ad naf amgarad meqqren, ladɣa gar tɣiwanin n ugafa n Tizi Uzzu i d-iḥerzen amur ameqqren deg unegmu deg yal aḥric n tdamsa. Ma yella d tiɣiwanin n unẓul n ugerzu, mazal-tent deg yir addad deg yal aḥric n tdamsa. Ɣas ma d yiwet n tɣiwant i ijerden isem-is s wuraɣ deg yisebtar n tegrawla n 1954, u ɣas ma tefka-d aṭas n wudmawen n umezruy yennuɣen mgal acengu afransi-is, yecban Krim Belkacem d wiyaḍ-nniḍen, ar ass-a, mazal taɣiwant n At Yaḥya Mussa gar tɣiwanin timaɛḍar n ugerzu n Tizi Uzzu ɣer yidis n tɣiwant n Mɛatqa.
Aɣbel n lgaz n temdint d waman n tissit
Ɣas ma imḍebbren n ugerzu n Tizi Uzzu, ɣef uqerru-nsen lwali yewɛeden acḥal d tikkelt deg tirziwin-ines ɣer tɣiwant s tifrat n uɣbel-agi n lgaz n temdint merra tnezduɣin n temḍiqt, maca deg tilawt, mazal aṭas n twaculin n tɣiwant, ad sɛeddint tagrest mebla lgaz n temdint. Ad kemmlent akked lḥif n teqraɛtin n lgaz. Aɣbel-nniḍen i iḥuzan tamḍiqt-agi n leqbayel, d aɣbel n waman n tissit. Dɣa ula deg tallit-agi n tegrest, ulac aman. Amedya n taddart n Helli, ur nesɛi ara aman n tissit ugar n sin (02) wagguren-aya s sebba n wansig deg yiqadusen n waman. Yezga uɣbel-agi n waman deg tudrin n tɣiwant, ladɣa deg tallit n unebdu, anda tikwal ur d-ttuɣalen ara waman ugar n sin (2) wagguren.
Taɣiwant mebla annaren n waddalen d inidan n usnuffes i yilmeẓyen
Ur sɛin ara yilmeẓyen n tɣiwant n At Yahia Moussa anda ara rren : la ixxamen n yilmeẓyen, anda ara kksen lxiq, la inurar n waddal yemgaraden. Akka i uɣen amekkan yir cufat uɣent deg taggayt-agi n yilmeẓyen, ladɣa lehyuf d tissit n ccrab.
Yir addad n yiberdan
Ṭṭuqqten yiɣeblan deg tɣiwant-agi. Gar-asen yir addad n uẓeṭṭa n yiberdan yemgaraden n tɣiwant ur nemɛin ara i telḥin n ṭumubilat, yeɣza deg yal tardast s sebba n waman n ugeffur, imi ugar n 8 n yiseggasen-aya, ur iɛawed ubrid.
Aɣbel n tnezduɣin
Ɣer yidis n tuqet n tɣiwanin n ugerzu n TiziUuzzu, yezga uɣbel n tnezduɣin d aɣbel d ameqqran, ladɣa imi ala ahil n tallelt n tnezduɣin n lebni i yellan kan deg tɣiwant-agi. Akka ara naf, dɣa, ugar n 1 500 n yimdanen, i yessuturen tallelt i lebni. Ṭṭuqqten yiɣeblen, ama deg uḥric n tdawsa, deg usefti, deg wahilen n unegmu n tɣiwant…atg. Ɣef waya i ssuturen yimezdaɣ n tɣiwant deg yimḍebbren n ugerzu n Tizi Uzzu i wakken ad d-rren lewhi ɣer tɣiwant-nsen maɛḍuren deg yal aḥric, ad d-afen tifrat i yiɣeblan i deg ttɛiccin.
Ali Zalouk