Kṛad n wussan s lekmal i yeqqim ibelleε ubrid aɣelnaw 09, i yellan gar Xeṛṛaṭa d Ṣṭif. Ayagi yella-d ass n 16, 17 d 18 deg wayyur n duǧember. Seld aṭas n wagguren n uraju, i yebnan ɣef lewεud (imiruyen) n yimḍebbren n tɣiwant di tefranin yezrin i yimezdaɣ, belli ad asen-d-xedmen lgaz n temdint, ifaḍ uεeyyaṛ n ṣṣber. Ttwalin lɣaci-nni belli ma yella mačči di lawan-a n uṣemmiḍ ara afen lgaz-a, ulayɣer deg unebdu. Arraw n ṭemnaḍin n Merwaḥa d Ṭṭabya, ur ufin tifrat i wugur-nsen, ala tuffɣa i ubrid d ugzam-is, acku ɣef leḥsab n yimezdaɣ, ulac d acu ur xdimen ara s tin n lεali. Abaεda, tibṛatin-nsen i yuznen i yimḍebbren n tɣiwant, anda i asen-mlan yakan aεewwiq-a. Rnu i waya, tirziwin-nsen ɣur uselway n tɣiwant, anda i as-segzan d akken tuddar-nsen d tid yeḥwaǧen nezzeh lgaz-a, ma neẓṛa di tegrest, yekkat udfel s waṭas. Ad d-nesmekkti d akken, ayen yernan i tmes n zzεaf-nsen andar, d imḍebber n yiṣenfaṛen-a i asen-yefkan awal belli ad kemmlen aṣenfaṛ-a n lgaz ulamma i tuddar yellan deg yidurar, meεna imi d-telḥeq teswiεt n tidet, yuɣal ɣer deffir. Wid i d-yeffɣen s iberdan, gezmen-tt di ṛṛay-nsen, ugin ad uɣalen ɣer deffir, haca ma yella usan-d ɣur-sen yimḍebbren n twilayt. Dɣa, yeffeɣ laεtab-nsen ɣer tafat, imi seld 3 n wussan n lmeḥna d ucekti n yimsebriden, yessuter-asen-d lwali timlilit i wakken ad yefru aɣbel-a, ideg i asen-d-yefka awal belli ad tefru temsalt-a deg wussan i d-iteddun. D ayen i ten-yeǧǧan ula d nutni serrḥen-as i ubrid, snuffsen cwiṭ.
K. K.