Akken ad d-yili uheggi ilaqen i umager n wuraren n yilel agrakal, ara d-yilin deg Wehran, bdan yimasayen n twilayt aḍfar n yiṣenfaren akken ad mmagen amek iwulem, ad kfun deg wakud-nsen. Imi ula d wid yellan nnig n yimasayen-agi am teɣlift n umahil azayez, rezzun-d s ṭṭaqa i usefqed n yiṣenfaren. Ɣas mazal yebɛed wazemz n usiher, imi uraren-a ad d-ilin seg 25 yunyu ar 5 yulyu 2021, maca ma yekfa leqdic di lawan, anamek-ines ad imud tugna yelhan i temdint-a n Wehran, yenxeṣṣen akka tura deg waṭas n taɣulin, ɣas akken awanek ur icuḥ ara s tedrimt i temnaḍt-agi. S unamek-nniḍen, ur ttruḥun ara yiṣurdiyen ɣer yidgan-nsen, ɣef waya i d-yettili uɛeṭṭel di kullec, tugi ad temhaz tudert n yal ass n uɣerman.
Deg tilawt, mačči arma iḥḍer-d usiher anaddal yesɛan azal ara kkren yimasayen ɣer leqdic n unegmu n temdinin. Ɣef usentel-a n wuraren n yilel agrakal, “tettunefk tedrimt s lqidar n 3 imelyaren n dinar i tenmehla n tsegda d lebni n twilayt n Wehran, ad ruḥen srid i uheggi n yidgan d lecɣal iwulmen”, i d-yenna unemhal n termist-a Mass Boubekeur Bensayah. Gar yiṣenfaren ideg i bdan lecɣal deg wussan-a, d lxedma n ubrid n yimuṭuten n yigenni (piste cyclable) ɣef teɣzi n 4 ikilumitren, tura wwḍen deg-s lecɣal ɣer 20%, aṣenfar-agi d tirmit tamezwarut deg wakal aɣelnaw. Aṣenfar-nniḍen, ad d-yili deg tamiwin i d-yezzin i unnar ameqqran yetturajun ad yekfu deg unebdu-a sdat-neɣ, i yellan deg tɣiwant n Bir Lǧir am tafat tazayezt d wallus n yitruṭwaren.
Daɣen deg yiɣrem Sidi Lbacir, yetturaju ad as-selsen tahuski d tezdeg, imi yezga-d kan qbala n unnar (complexe) ameqqran, ma d lecɣal d wid yewwḍen ɣer 35%. Yemmeslay-d deg wawal-is unemhal Mass Bensayah ula ɣef ubrid n utramway, ideg i d-yettili usewseɛ-ines akken ad yaweḍ arma d adeg-agi yettuɛeynen ad d-ilin wuraren n yilel agrakal, acu kan yesḥasef imi ur ikeffu ara uqbel asiher-agi, u yenna mačči deg ufus-nsen. I usmekti, abrid-agi n utramway yewweḍ ɣer 18,7 Km, yettwabḍa ɣef 32 isebdaden, ibeddu seg umezwaru Sidi Meɛruf, ikeffu deg Ssanya, yebda leqdic deg useggas n 2013.
K. A.