M. Smail
Tamdint n Ziralda i d-yezgan tama n umalu n tmanaɣt telli tiwwura-s i yiwet n rreḥba n ddabex n uḍar ideg ttekkint aṭas n trebbaε ilmend n teqbuct tafriqit n yilmeẓyen ddaw 17 n yiseggasen. Aṭas n yimferrğen i yerzan s annar n temdint-agi iwakken ad rebbin afud i yimdukal n Ben Deḥman (mačči win n CRB), ahat meqqar imyurar-agi ad d-rren i Lezzayer iseγ i d-ḥellan yimezwura imi ɣas nerbeh s yiwen n yiswi ɣer wulac, d lfal igerzen. Deg unnar, imyurar Izzayriyen seddan timlilit akken iwata, ur brin ara i yifassen zdat widen yettwasnen di ddabex. Les éléphants indomptables n le Cameroun ufan-d zdat-sen yiwet n terbaεt yeddan d yiman-is, imi ur kukran, ur ugaden, uraren s wudem yessefraḥen. Γef rray n waṭas n yimdanen, ilmeẓyen-agi zemren ad awin amecwar ameqqran yerna s uzday n lqedd. D acu kan, kra akk iɣef i tezzi umeslay d tamsalt n tedrimt. Yal wa amek i ihedder. A yaddra, ma s yimelyunen i tturaren wigi neɣ ala? Aḥric ameqqran n wid yettḍafaren addal nnan-d ur ttwaxelsen ara imeẓẓyanen-agi am wakken ttawin imeqqranen. S yiwen n wawal kan, wigi “Uqbel ad gren asurif, zzewren nnif”. Aya, nezmer ad d-nawi kra n ttbut: di 1982, asmi akken tamurt n Lalman tessenhez-itt terbaεt n Lezzayer, ulac kra n wid yettmeslayen ɣef udrim. Khalef d yimyurar rran lwelha-nsen ɣer wurar yelhan d ugemmuḍ ara icebḥen tamurt-nneɣ. Syin ɣer da, bdan imelyunen ahat imelyaren ttsewwiqen deg yinurar, mi iɣab nnif d yiseɣ. Iqdimen n yiseggasen n 80 sḥasfen aṭas, mi ttwalin tarbaεt n Lezzayer ur tezmir ara ad taweḍ ula ɣer teqbuct tafriqit. Ass-a, nessaram i Rabah Saâdane afud igerzen, d acu kan lwelha ilaq ad tezzi ɣer yilmeẓyen-agi i nwala di Ziralda. Nessaran d wid ara yezzuzfen lḥif n waddal i tmurt-nneɣ.