Tidukla n yiselmaden n tutlayt tamaziɣt d Tenmehla n usegmi n Tizi Wezzu suddsent yiwet n temlilit n krad n wussan deg uɣerbaz alemmas Base 07 n Uẓeffun i d-yewwin awal ɣef uselmed s usenfar deg usami s tzemmar (Le projet au profit de l’approche par compétences). Timlilit-agi tejmeɛ-d 70 n yiselmaden d tselmadin i d-yusan seg yal tama n lwilaya akked imaswaḍen n tmaziɣt n Tizi Wezzu. Iselmaden d tselmadin, seg tama-nsen, ferḥen mliḥ s temlilit-agi, imi aṭas deg-sen urǧin ḥeḍren timliliyin yecban ta. Fahima, yiwet seg tselmadin n uswir alemmas, tenna-aɣ-d armi d tikelt-a i tefhem d acu-tt tarrayt-agi, d acu lferq yellan gar tarrayin n uselmed, amek ad tessexdem tizemmar (les compétences) deg uselmed-ines. Roza, taselmadt deg Ɛin-Lḥemmam, tenna-aɣ-d s ucmummeḥ tura kan i teẓra d acu i d asenfar, amek ad tessiweḍ ad tessemres deg uselmed s tzemmar. Akk inelmaden d tnelmadin i nmuger deg temlilit-agi setɛerfen imir-a kan i ẓran lferq yellan gar uselmed s tzemmar d tarrayin-nniḍen am uselmed s ugbur (approche par les contenus) d uselmed s yiswan (approche par objectifs). Am wakken ariḍa kan i faqen amek ad sxedmen asenfar akken iwata deg uselmed s tzemmar. Timlilt-agi yeḍran s tallelt n tɣiwant n Uẓeffun d yiwet gar temliliyin i tettheyyi tdukla n yiselmaden n tmaziɣt n Tizi Wezzu aseggas-a. « Asileɣ (la formation) d iswi amezwaru n tdukla-nneɣ,; acku nwala lexsas n yiselmaden d tselmadin n tutlayt-nneɣ deg uḥric-agi. Timlilit i d-iteddun tezmer ad d-tili deg tɣiwant n Tizi-Raced. » i aɣ-d-yenna Mass Budinar Mhenna, aselway n tdukla-agi.
Ḥ.A.M