Neẓra merra belli lqidar n tamemt i d-yettwakkasen seg teɣrasin yenqes almi dayen deg umaḍal merra iseggasen-a ineggura ladɣa. Imi llan ula d wid ixesren deg-sent, i ur d-ntekkes ula d akilu. Ladɣa wid ikeccmen ulzuz (marché) xeddmen tanezzut. Imrebbiyen n ubɛuc-a deg yettaf umdan abaɣur, zgan ḥaren ɣef wayen i d-yewwi ad gen deg teswiɛt-nni akken ad d-tuɣal lfayda, skud akken xedmen xesren. Maca, ɣas ahat deg tefsut-a ur yelli d aṭas n tamemt i d-kksen tuget, sey-a ɣer unebdu ttwalin yella usirem d ageɛmir belli tizizwa ad d-heggint ddeqs seg uɛenqud-nni ɣef waṭas n sebbat. Yiwet seg-sent imi tezher tefsut akken iwata ladɣa deg yidurar ɛlayen. Tizizwa ufant tagnit i ḥemmlent i leqdic ideg zemrent ad wennɛent, imi agama iferreɛ-asent-d iɣallen s yal asenf d ajeǧǧig. Sebba nniḍen, d mi d-iban urwent tzizwa, ftint deg waṭas n teɣrasin. Ihi simmal ttciḍent tqeddacin, simmal yettili-d uxdam n tamemt ugar, akken iwata. Awi-d ukan ur ṭṭuqquten yindaren n tmes send tawala-nni, ed yir iɛdawen am tnulya ed tnejdamin. Ma d tamentilt tis kraḍ, teɛna kan wid ur d-nekkis tamemt deg tefsut-a, akken ahat ad tt-ǧǧen i tzizwa ma yeḍra-d srant-as. Dɣa, widak i ur nḥuza taɣrast deg tefsut-a, nwan ad afen ddeqs n wayen ara d-kksen d tamemt sey-a ɣer unebdu, neɣ alama yewweḍ-d umwan. Aya, ad yili s waṭas n nnfeɛ ula i uɣerman, ma neẓra ad tsub ssuma n ukilu neɣ n litra n tamemt!
Mhenni Xalifi