Tikubaniyin iɛeqden akked tɣiwant n Bgayet i ujmaɛ n yilefḍan (leknis) n temdint n Bgayet atan ḥebsent ɣef lxedma si taggara n ddurt iɛeddan. Ssebba n waya, d leɛqud i yettwajerden gar-asent d tɣiwant wwḍen ɣer taggara deg wayyur yezrin. Akken d-qqaren, ula d-ixeddamen-nsent ur ttwaxellsen ara.
Yezmer lḥal taɣiwant ur tettɛiwid ara lxedma yid-sent, akken i aɣ-d-yenna deg wawal-is Mass Hakim Zaïdi, yiwen n uɛeggal deg usqmu n tɣiwant n Bgayet. Am wakken i d-yerna ixeddamen n tɣiwant beggsen-d ad ḥebsen amahil ɣef ssebba n lexsas n ttawilat n lxedma deg uḥric-agi n tezdeg. D acu kan, segmi i tweɛɛed tɣiwant ad awḍen ttawilat deg ussan-a i d-iteddun, beṭṭlen aḥebbus-nsen.
Mass Hakim Zaïdi yenna-d: “Ur fhimeɣ ara sebba iwacu “la commande” n ttawilat n umahil n tezdeg i tsuter tɣiwant deg zzmam n tedrimt n 2008 ur d-lḥiqen ara ar assa”
Djouher.C – Amastan.S