Ulac win yesɛan l’internet deg uxxam-is ur yuzzil ara ɣer Actel akken ad icekti. Ahmed yenna: « seg wasmi ay sɛiɣ l’internet deg uxxam, qrib sin n yiseggasen aya, daymen ad tili ddurt deg wayyur, ulac l’internet. Cekti neɣ qqim, akka kan i tga Actel »
Tikelt-a, daɣen, qqimen wid yuɣen tanumi ččaččayen neɣ ttmeslayen d wid-nsen, azal n ssmana mebla l’internet. Ugur-a akken i d-tenna Karima: « waqila yella-d kan deg Bgayet d tamiwin i as-d-yezzin imi anda-nniḍen sɛan. » Yiwen seg wid ixeddmen deg Actel, yenna-d: « S ttawil yellan ass-a i l’internet, Bgayet ur tezmir ara ad ternu yiwen. Yakkan, tura ttawil yellan ass-a ɣur-neɣ,; ur yezmir ara ad d-yefk le débit akken ilaq imi nnig lazem i ikeččmen ɣer l’internet. «
I usmekti, asmi i as-d-serrḥen i l’internet deg tmurt-nneɣ,; yenna-d Amar Tou, deg lawan-nni d netta i d aneɣlaf, « ur ilaq ara ad teqqim yiwet n twacult deg Lezzayer bla l’internet ». Imir, serrḥen-as setta wayyuren s 3500 DA, modem baṭel, ad ak-d-rnun ayyur baṭel. Tidet kan, ayyur n baṭel ẓran ass amezwaru iwacu i t-id-fkan, mi ara tḥesbeḍ acḥal n wussan i ulac l’internet; ahat, ad asen-tettayaleḍ ussan! Nnig waya akken i d-yenna Ali: « mačči d ADSL i nesɛa, d l’internet dudac dudac. «
D. I