– Ini-d belli tḥemmleḍ-iyi mebla tilisa ! Dɣa serrḥen-as d taḍsa, kemmlen abrid, afus deg ufus, iṭij yedda acḥal n yimurar deg yigenni. Ur ukin s lweqt amek i yezri !
Katya tecmumeḥ,; allen-is ččurent-d d imeṭṭi n lferḥ,; dɣa temmeɣ ɣef Sifaks, tḥennec-it-d ɣur-s, tessuden-it s wul-is… Sifaks icennu-as tizlit- nni n Mğahed Ḥamid : D kem siwa d kem ay ḥemmleɣ. Ma ulac-ikem i wumi-yi… Kɛekɛen d taḍsa i sin, kemmlen abrid-nnsen, cennun akken deg sin…
Ṭṭfen amecwar akken deg udfel, alammi jban akkin, dergen i tmuɣli. Ur ḥulfan la i usemmiḍ,; la i llaẓ i yekkaten taɣerbalt deg yiεebbaḍ-nsen! Ttun iman-nsen. Tayri mi ara tekcem ul n umdan, mačči d ayen isehlen…
Mi d-uɣalen tameddit akken ad ruḥen, ṭṭfen-ten iğadermiyen deg ubrid, wwin-ten ɣer lḥebs. yenna-asen yimḍebber-nni ameqqran :
– Ur ilaq ara ad ttemyaḥmalem, s wudem unṣib, tayri d lεib ay imcumen ! Iyyaw tura ad terwum rray-nwen, imiren ad ttwalin amek i teffɣem i ubrid… Deg tmurt-agi, ulac tayri, ulac leḥmala, ulac timilit d urgaz d tmeṭṭut uqbel ad mizwağen. Kunwi, terwim tamurt. Deg ddra n yimdanen am kunwi i d-ttilint zznezlat, iḥumal n waman, aḍu yessiffigen leqramed, lmujat yettawin timura. Ha ! Ad tuɣalem ar lecɣal am wigi ! Ssufɣet cciṭan deg wul-nwen…Dɣa yessufeɣ-iten-d !
Azekka-nni, wwin-ten srid ɣer tɣiwant εeqden-ten !
Aseggas kan msebran ! Tayri-nni akk truḥ ! Yeɣli yizi deg zzit ! Amzun mačči d wid-nni n zik, acku tayri n tmara, mačči d tayri !
Djamal. Arezki.