Lexmis iɛeddan, Berbère TV, deg yiwet n tesgilt i d-yessewjed Kamel Tharwiht, ajgu n tezlit taqbaylit, Lounis Ait Menguellet, yeldi-d ul-is, yemmeslay-d ɣef waṭas n temsal. Yessafrer tagut ɣef waṭas n yimennan, yerra sserf i wid yestufan, yessenduyen aman.
D amedyaz s tidet, daɣ d amɣar azemni ! Yak yenna : “wi yebɣan ad tseggem, yezwir iseggem iman-is.” Ayen akk i tedda tedwilt, ur d-yebri i rregmat neɣ i yir awal, au contraire, aẓeṭṭa n tegmat yerwin yebɣa ad as-yerr tundar iwakken ad yemlil. Tamsalt n tmettant n Matoub, yesqerdic ɣas di kra n yimeslayen, maca ččuren d anamek. Amek ihi, “ma ur cniɣ ɣef wid yemmuten ad zenzeɣ iɣsan-nsen, dir-iyi !” Nnehta yerra-tt-id mi d-yenna : “Yemmut meẓẓi, a wi yufan lukan mazal-it iwakken ad nerfed akken ccna n teqbaylit”. Lounis, ur yezzi ur yenniḍ deg wawal, yerra tajmilt i Lounès, ma d ayen i ten-iferqen yiwet n tallit akken d ayen i iferqen atmaten wala leḥbab. Yenna:” ttemxallafen medden dir rray, ur yelli kra nniḍen !”
Tiyita n ufus i Berzidan ! Amedyaz-nneɣ yessefra-tt-id : “wwteɣ afus, ɛecra n yiseggasen mbeɛd, wid-nni yestufan xedmen am nekk neɣ ahat ugar, donc, walan ihi sɛiɣ lḥeq. Tayeḍ,; wwteɣ afus, ahat sxesreɣ,; wigi yestufan yenwan faqen, ɛecra n yiseggasen mbeɛd uɣalen ɣelṭen nutni.” Ɛqel-itt neɣ bibb-itt ! Ma ɣef wasmi yecna di tfaska-nni n “l’année de l’Algérie en France”, mi akken temcebbal tmurt n leqbayel, Lounis yenna : “D tagnit anda ilaq ad nessiweḍ tiɣri n yilmeẓyen-nneɣ ɣer berra.” Yettkemmil : “Ma nutni ttnaɣen, ttmettaten, nekni nessusem, mačči d sswab. Yerna, awah di Rebbi lukan d wid yeddan amecwar deg unnar ara yi-sneqden.”
Tout compte fait, Ait Menguellet seg wid izeggiren nnif uqbel asurif. Lukan i terbiḥeḍ ay ul, kra wanda yella uqbayli ad yili akka, acku tafat d iɣallen yeddukklen !
M. Smail