Azekka ad temmekti temdint n Bgayet d tamiwin i as-d-yezzin, tidyanin yeḍran di19 mayu 1981. Tidyanin-a bdant di tazwara s tikliwin n yinelmaden n tesnawiyin n Yiḥeddaden d Lḥemmadia, anida wid i tent-id-yessudsen, ṭṭalaben tugdut d usteεref s yisuturen n MCB. Iɣallen n laman rran-d s leqseḥ am lεada-nsen, ladɣa aṭas i yeṭṭfen ɣer lḥebs. S wakka tikli tuɣal d tamesbanit i d-yeṭṭfen aṭas n temnaḍin yecban Seddouk, Sidi Aich akked Weqbu. Timesbaniyin-a kkant aṭas n wussan, anida kkren ccwalat qessiḥen gar yiɣallen n laman akked yimesbaniyen, i yellan di tuget-nsen d inelmaden, ad nebder kra seg-sen : Mokrane Agoune, Bellache Boukhalfa d Gérard Lamari. Aneggaru-ya, deg yiwet n tdiwennit i as-iga lwit www.tamazgha.fr yenna-d : « Tidyanin n 19 mayu 1981 i yeḍran di temdint n Bgayet d tama n Summan, d akemmel n umennuɣ n tefsut n 1980 i d-yellan di Tizi Wezzu, ladɣa aṭas n yimeɣnasen n tallit-nni i yekkin di tmesbaniyin n Bgayet llan seg-sen ula d wid i yettwaṭṭfen ɣer lḥebs ».
Acu kan, deg yiseggasen-a ineggura nwala drus n yimdanen i yesεan isallen ɣef tedyanin-a, tuget ur t-ssinen ara. Ula d tidukliwin tidelsanin i iqeddcen di temnaḍt-a ur d-lethant ara d usekfel n tedyanin-a i yesεan azal.
Mokrane Chikhi