Asqamu n tdukla tadelsent Yusef u Qasi, yennejmaε ddurt-agi, akken ad yebdu leqdic n tedwilt t-7 n “Wussan n Tmedyazt Si Muḥend u Mḥend d Yusef u Qasi”. Tadwlit-agi akken i d-yenna uselway n tdukla Mass Ɛerqub Ɛabdella ad tili gar 25 d 31 yulyu 2009.
Tadwlit-agi ad tili, tikelt-a, d tajmilit i sin n yimedyazen yettwassnen aṭas deg unnar n tsekla taqbaylit : Hajira Ulbacir akked Ben Muḥemmed. Γef waya, imedyazen yebɣan ad kkin di timsizelt n yisfera zemmren ad ceyεen si tura alma d 31 yunyu 2009, tlata n yisefra ɣer tdukla tadelsent Yusef u Qasi s ttawilt n le fax neɣ l’email [email protected], neɣ ad ten-sersen din deg uxxam n yedles Mulud Mɛemri di Tizi Wezzu.
Amaynut s wacu ara d-teglu tadwlit-a, nnig timzizel n yisefra akked d umezgun d timziknin d yisaragen, d timsizelt-nniḍen i wid ixedemen ayen iwmi neqqar les montages poétiques.
Lebɣi n yiεeggalen n tdukla amer ad yihriw ubrid zdat n tsekla taqbaylit s wudmawen-is merra, akken ad taf agni iwulmen i unerni-ines akked d tenflit-ines.
Ait Slimane Hamid