Larebɛa iɛeddan, rradyu tis snat terra tajmilt i yiwen seg tgejda n tmedyazt taqbaylit. Tadwilt “Iɣzif ay iḍ” ur tessaweḍ ara ad d-tessenṭeq akk irgazen d tulawin i d-tesnubget ɣer tejmilt-a. Seg uletma-s Malha alamma d Mdjahed Hamid tɛeddiḍ-d ɣer Lounis Ait Menguellet d wiyaḍ,; awal itezzi ɣef yisefra yura Mohamed At Hmadouche. Iḍrisen-is, cnan-ten aṭas n yinaẓuren yettwasnen. Aniwa ur tezzuzen ara tezlit “A baba inu ba” ? S kra n win i d-yemmeslayen, qqaren amek yessaweḍ umedyaz-agi ad yifrir seg talɣa taqdimt n Si Mohand ɣer yiwen n wudem amaynut ? Ayen akk yeswehmen medden d asmi akken yecna ɣef ayen tettidir tmeṭṭut, iḥulfa-yas am akken d netta i yettidiren taswiɛt-nni. Di tezlit “Tameṭṭut”, d ayen ur yezmir urgaz ad t-id-yini ! Γef waya dɣa, tettunef-aɣ tegnit nemmuger-d amedyaz-agi deg yiwet n tfaska di temkerḍit taɣelnawt. Asteqsi-nneɣ d ayen iɣef ttmeslayen medden : Amek Ben Mohamed iḥulfa i wayen kan i tettḥulfu tmeṭṭut ? yenna-d : “Tamḥeqranit tettruḥu si lǧil ɣer wayeḍ,; nedder deg-s s umeqqran s umecṭuḥ,; d ayen iyi-yessawḍen cniɣ deg umkan n tmeṭṭut”.
Ayen tedda tedwilt, Ben Mohamed izerreɛ deg wawalen n lxir, n tegmat n leqder. Yettwessi ɣer lxedma, yakk d netta i d-yennan di Berbère TV yiwet n tikkelt : “Berka-yaɣ aɛiwed i yiɣsan tibbit”.
Yusa-d ɣer Tubiret di rreḥba tis 5 n udlis amaziɣ. Tisin-is s wazal-is, imi di lbal-is d asaki n tdukliwin tidelsanin, d wamek ara yili leqdic n yiɛeggalen-is di tallit-a.
Tajmilt i as-yuɣalen yuklal-itt, imi anta taswiɛt ideg yesdari aqerru-s ? yezga seg yimezwura, yenjer abrid i yineggura. D amezruy ur nzerri !
M. Smail