Ass n larebɛa 21 deg mayyu 2003, ssaɛa d 7 d 45 ddqiqa, tewwet zlezla yewwḍen ɣer 6,7 deg deg Bumerdas. Tewwet swaswa deg umkan iwmi qqaren Zemmuri. D zlezla i yewwin azal 2300 lmeytin d 11000 n yimejraḥ d wazal n 15000 n twaculin iwmi hudden yixxamen-nsen. Tesmekta-d zlezla-ayi i lḥukuma tazzayrit tama ufella n tmurt d tin yezgan deg temnaḍt, akken i d-qqaren imusnawen, anda lqaɛa tettḥerrik s waṭas.
D ayen ur iqebbel leɛqel, lbaṭimat d tijdidin ɣlint-d am tbuɛjajin. Aya yesban-d yiwen ur yeḍfir ilugar ama wid n lebni neɣ wid yimukan ilaqen i lebni. Daɣen, imusnawen qqqaren-d, uqbel n 2003, ula d leqwanen yerzan lebni ur laqen ara ɣas ma llan yiwen ur ixeddem yes-sen, am lḥukuma yettaken ttesriḥ i lebni am wid ibennun kra ur yeddi d leplanat. Awi-d kan, i yiwen ad bnun ad tekkes cwiṭ seg txennaqt n temzduɣin, i wiyaḍ awi-d kan ad fakken lebni ad rebḥen cwiṭ usurḍi. Ass-a, amek dɣa widak-a zemmren ad ddren bla axemmem ɣef yimerḥumen-a n twaɣit n Bumerdas ?
Seg wass n 21 deg mayyu 2003, aneɣlaf n lebni d ssrabes akk yerzan asafar-a, iɛawed i leqwanen, yessuffeɣ-d ilugan ijdiden, ma deg unnar wissen amek i tḍerru ? 6 n yiseggasen deffir twaɣit-a, wid nesteqsa ama d les architectes ama d ijenyuren n lebni ama d wid yeskelfen deg tɛessat n lebni, qqaren-d : d tidett ibeddel kulci meɛna yiwen deg-neɣ ur yeẓri d acu i ccɣel-is, d acu i yeṭṭef deg unnar.
Daɣen seg yimir, teslul-d lḥukuma-nneɣ yiwet n tenmehla ara yeskelfen ɣef twuɣa yecban zlezlat, iḥemmalen n waman, atg. Imi, ayen yuɛren d tallit-nni tamezwarut anda imezdaɣ teṭṭef-iten tergagayt ma ssrabes teɛreq-asen tama ara aɣen ; dɣa yiwen ur yeẓri d acu ara yexdem yiwen ur nessin amek ara yesselḥu taswiɛt-nni. D tidet, deffir n wtuɣa, iberdan regglen hudden, sbiṭar ɛemren, trisiti tettruḥ,; tilifun ur iteddu ara, lgaz yettfuḥ,; atg. ; amek ara iqabel yiwen tilufa am ti deg yiwet n tallit. Asmi ara tesleḍ lmir n yiwet n tɣiwant, yettnadi ɣef lambat imi ulac trisiti ɣur yimezdaɣ iwmi hudden yixxamen, neɣ am le pompier i yettnadin ɣef lpalat akken ad selken amdan, neɣ tid n lɛesker i d-yeffɣen ad ɛiwnen imezdaɣ s sslaḥ-nsen deg yifassen ; lḥasun tiqsiḍin am ti bezzaf ay yellan. Telha imi tella tenmehla yesskelfen ɣef waya, ma deg unnar, yenna-k Ḥmed yellan deg ssrabes n Bgayet : “nettwali deg uḥemmal yuɣen Γerdaya, ɣas tella tenmehla, meɛna kullec yeqqen ɣur-s, atan deg Lezzayer tamaneɣt, ad tettrayyi ɣer Γerdaya. Ilaq ad tɛiwed tamuɣli-s.”
Γas d tallit yuɛren deg useggas 2003, izzayriyen akken uɣen tanumi, s yiwen n ufus ay bedden ɣer watmaten-nsen n Bumerdas, s yiwen n wul i ten-ɣaḍen imezdaɛ n Bumerdas, s yiwen n yimi ay sḥasfen ɣef twaɣit-nni.
Djamal Ikhloufi