Kra ur t-id-yerni lqanun i d-tessuffeɣ lḥukuma tazzayrit, ilindi, deg tedyant-a n “Lḥaragga”. D tirga mxalfa i wid yettxemmimen s lqanun ara tt-frun. Arrac mazal ttnadin ad ruḥen. Mazal ur yebdi unebdu, Ilemẓyen-nneɣ kkaten yakan ad zeggren lebḥer ɣer Ṭelyan neɣ ɣer Spanya. Deg Wehran, ijadarmiyen sḥebsen 24 deg yiwet n ddurt. Deg Ain Turk, 85 i yettwaḥebsen qef ddemma n trewla seg wasmi yebda wayyur n mayyu. Deg Annaba, azal n 99 i yettwaṭṭfen seg wasmi yebda unebdu. Deg Bgayet, 5 deg yiwen n wass, ufan-ten daxel n lbabur i iteddun ɣer Ṭelyan. I wid ur nettwaṭṭef, wiss acḥalyečča lebḥer ? Wiss acḥal yewwḍen ɣer umkan i qesḍen ?
Deg Bgayet (wali arrat yura Muḥend Ait Ighil), tadyant n 5 n yilemẓyen yettwaṭṭfen daxel n lbabur, tbeyyen-d mačči iman-nsen kan i llan yilemẓyen-a. Llant trebbaɛ i ilethan deg uheyyi n lecɣal : anda yella lbabur, melmi ara yeffeɣ seg usagen, anda iteddu, amek ara kecmen ɣer daxel. D tirebbaɛ i yeskellifen deg lḥaragga, yettawin asurḍi n yilemẓyen yumnen ad awḍen s amkan.
Mačči s lqanun ara tefru tedyant. D tamezduɣt d uxeddim i ixussen. D laman seg wid i iḥekkmen tamurt ara iqelɛen tadyant-a n rrwaḥ deg wallaɣ n yizzayriyen.
Djamal Ikhloufi