Ussan-a ineggura, ttembiwilen wid yerran tamurt d annar i uwuzzeɛ n yidammen. Qeddcen fiḥel tameslayt, fiḥel asuget n wawal.
Qeddcen s tsusmi, awi-d kan ad awḍen ɣer lebɣi-nsen : ad sbedden ddawla islamiya ideg ara teẓẓu ccariɛa.
Deg Bgayet, yiwen seg wid yumnen ala s ubrid n salafisme ara d-teffeɣ tamurt seg tallast ideg tezzer (imi yumen neɣ imi t-ssamnen ddexan d leḥram), ibeddel taḥanut-is yellan d lekyusk ɣer tin yeznuzun lxeḍra d lfakiya. Mačči ala wa, deg yiwen n uzniq, qqaren-d wid akk yeznuzzun ddexan, beddlen imi umnen belli yessehlak imdanen yerna iḥerrem-it Rebbi. D nutni i yebɣan ad ibeddlen mačči s ssif neɣ s uɛekkaz, meɛna azniq yezzi i lǧameɛ n tẓallit ideg ggten les salafistes.
Aya, ziɣen mačči deg Bgayet ay yella, yuɣ aẓar deg waṭas n temdinin n tmurt n Lezzayer. Iɣmisen, ussan-a ineggura, wwin-d awal ɣef leqdic ur nban ansi i d-yettenfal meɛna yeffel ɣer tmetti, yuɣ asurif meqqer gar yizzayriyen. Deg Lezzayer tamanaɣt, aɣmis n L’Expression, yules-d ɣef tedyant iḍerrun yal ass deg yiwen n uzniq yettwasnen d aglaf n les salafistes. Γer lefjer, ɣer tewwura i sṭubṭuben akken ad d-kkren s win yettẓallan s win ur nettẓalla akken ad msetbaɛen ɣer lǧameɛ imi ssalatu xayru mina nawmi. Llan wid d-yettmeslayen ɣef tebratin i d-yettawin ɣef lfetwat. Wiyaḍ,; ḥekkun-d ɣef lmeḥnat i ttidiren wid yeznuzzun ddexan deg Lezzayer tamanaɣt, ad beɛden seg lbiɛ n lehṛam-a neɣ… Aya, d ayen i d-yesmektayen tallit-nni ideg tedder Lezzayer deg yiseggasen n 90.
Lḥukuma ur temniɛ ara aya ; trennu asɣar i tmes ! Deg tilibizyu, lawan n l’adan, d lawan ula Mass Bouteflika, aselway n tegduda tazzayrit tamagdayt, ad t-sḥebsen. Iḍelli yuɣ lḥal d masa’u lxayr, ass-a d salamu ɛalaykum, wiss anda tleḥḥu talfaza-nneɣ ? Fiḥel tameslayt ɣef uɣerbaz azzayri ideg yerran taɣuri d tasertit, ideg yerran d amnar i les salafaistes. Yeɛni ula d timetti teqbel aya, azal n tlawin yerran lḥijab d aselsu-ines yettnerni yeqqar mazal.
D timetti neɣ d adabu. Abrid yenjer. Iḍelli d tisusaf d ujenwi d tersast, ass-a d abrid-nniḍen, d abrid ara yaɣen aẓar deg tmetti, d abrid i yessamanen izzayriyen. D tidet, iḍelli d FIS yuɣalen d GIA, ass-a d wid ikecmen leḥkem s tfednin ibeddlen timekḥelt. Iseggasen zerrin rennun, leǧnas teddun leḥḥun, nekni ntezzi ntenneḍ am yiɣuraf. Tasirt la teẓẓad awren i les salafistes !
Djamal Ikhloufi