Seg Uɣbalu ɣer Taddart n At Garet i d-yezgan deg tɣiwant n Leqser, igenni iɣumm s wabbu n tmes, tender deg tɣaltin n udrar n Yibarisen. Imesdurar ttwalin deg tzemrin-nsen ttruɣent ta deffir ta ; “d acu ara txedmeḍ a bu sin n yiḍarren ? Ad menɛen kan yimezdaɣ,; ad ttiḥnin ad ttiqil ɣef yigran !” akken i d-yenna Ɛemmi Saɛid n Ugemmun.
Deg ubrid-nneɣ ɣer din, azɣal yewweḍ ɣer 53. Nerza ɣer taddart n Ugemmun deg udewwar n At Garet, times ɣer yiri n ubrid i telleflef. Aḍu mačči d kra, yettzefzif, d ayen i yeǧǧan times ad tjelleb seg umkan ɣer wayeḍ,; ad taɣ akk deg tɣaltin. Imesdurar ttnejmaɛen-d, ttmuqulen sani d-tewweḍ tmes, ttnadin anwa-t yiger ay tečča, ttganin ahat ad zemren ad smenɛen ixxamen, ttḥessisen melmi ara teṭṭerḍeq lbumba-nniḍen imi d tamnaḍt yettwasnen deg Bgayet s yirebraben.
“Irgazen n tmes”, drus-iten, d awelleh kan i ttwellihen imezdaɣ. Yiwen gar-asen, yenna-d : “ula d aman ilaq ad neddu 17 km akken ad ten-id-nawi.” Ṭixer i umsedrar ad yeww ! Aṭas ay d-nmuger s ṭumubilat-nsen, kkaten ad ssiwḍen imuḍan n ddiqa ɣer tzeɣwa n usejji n Leqser ibeɛden s wazal n 24 km. Ma d wiyaḍ,; d tarewla ay d-rewwlen seg ddexxan d uzɣal.
Ayen d-yernan urrif i yimesdurar n udewwar At Garet, d awal n yimḍebber n ssrabes n lemḥadra deg rradyu n Ssumam i d-yennan : “dayen, nesbedd tasqamut ara d-igen leḥsab n txessarin n tmes n useggas-a deg lǧiha-nni.” Ziɣen ala i lehṣab ay d-gran !
Dj. Ikhloufi