Gar yisenfaren-a d ssuq amaynut n lxeḍra d lfakiya deg Draɛ Ben Xedda, i yellan d ugafa n temdint n Tizi Wezu ɣef teɣzi n 10 km. Lecɣal n usewjed wwḍen ɣer wazal n 70%. Ad yesɛu 218 n yiqiḍunen n uzenzi.
Si tama-nniḍen, tanemhalet n uzenzi, thegga-d asenfar n usewjed n ssuq n lǧemla deg tɣiwant n Tizi Wezzu, tama ubrid ameqqran yessufuɣen ɣer ubrid aɣelnaw w-12. Mazal ad bdun lecɣal n lebni d uqaɛɛed n ssuq-agi ara d-yessemlilen azenzi akk n lxeḍra d lfakiya n lwilaya n Tizi Wezzu, yettcektin taggara-ya deg leɣla n yisufar n wučči.
Dalila I.