Γer taggara n useggas 2009, takebbanit n Sonelgaz, ad tsufeɣ trisiti ɣer tmurt n l’Europe, ɛlaḥsab n wayen i d-yenna Mass Nourredine Bouterfa, anemhal amezwaru (PDG) n Sonelgaz, deg rradyu “Chaine 3”. Ikemmel deg wawal-is yenna : “asufeɣ n trisiti ɣer tmura n l’Europe, ad yekkes uguren n yinegzamen n trisiti ɣef yimezdaɣ n tmurt-nneɣ,; ad d-yawi daɣen kra tedrimt i tkebbanit n Sonelgaz.” Ma d asefhem, ur d-yessefhem ara amek ara tekkes teɛkemt n trisiti ɣef temdinin n Lezzayer. Akka, imezdaɣ ttcektin ɣef lqella i d-yettawḍen, d yinegzumen deg wussan n uɣamac, ma d Mass Bouterfa yettnadi ad d-yessekcem kra n l’euro i tmurt.
Ɛlaḥsab n wayen i d-yenna Mass Bouterfa, inegzumen n trisiti i d-yellan ussan-a seg wasmi i yebda wayyur n yulyu, deg tmurt-nneɣ “mačči d ugur n lixsas n trisiti. D lixsas n les transformateurs i yesɛan tazmert ad d-ffken ayen ilaqen n trisiti.” Ziɣen d aya kan ! Yerna “Snat n tamiwin, Bgayet d umalu n Lezzayer, ma yella ur ɣsiben ara yimḍebbren ad xedmen ayen ilaqen, ad qqiment i tallast deg yiseggasen i d-iteddun.”
Azɣal n unebdu n useggas-a, ad yeqqim deg umezruy imi i tikelt tamezwarut deg Lezzayer, anda asexdem n trisiti deg unebdu iɛedda s waṭas ayen i nessexdam deg tegrest, ilmend wayen i d-yessefhem Mass Bouterfa. Dɣa, tessaweḍ Sonelgaz ad tsexdem 7300 mégawatt deg yiwen n wayyur, d ayen i tsexdam deg 3 wayyuren deg tefsut. Gar tisebbiwin i d-yessegran aya : rrxa n yisismiḍen (les climatiseurs), tifesniwin n lḥamu ur nettqil iḍ,; irennun deg wass ɣer wayeḍ.
D. I.