Tzemreḍ ad aɣ-d-tmeslayeḍ ɣef umecwar-inek deg tẓuri ?
Akken ad awen-id-meslayeɣ ɣef iman-iw akk d umecwar-iw deg tẓuri, di tazwara lliɣ xedmeɣ deg temkarḍit (biblithèque), uqbel lliɣ d aselmad, selmadeɣ arrac imeẓẓyanen aẓawan, taklut, atg, daɣen ttawiɣ-d timucuha i warrac imecṭaḥ.
Truḥeḍ-d yakan ɣer tmurt n Leqbayel ?
D tikelt tamenzut i d-usiɣ ɣer tmurt n Leqbayel, ufiɣ-tt-id telha aṭas s ccbaḥa n yidurar-is, s lhawa-s d twenaḍt-is akked tesnubga n yimezdaɣ-is, dayen yesfraḥen aṭas.
Anwi inaẓuren n yiqbayliyen i tesneḍ ?
Tidet kan, ur sineɣ ara inaẓuren iqbayliyen, maca atni llan gar-aneɣ deg tfaska-yagi iwennan “Racont-Art” dagi deg Wizgan. Gar-asen anaẓur ameqqran Denis Martinez, dɣa ad farseɣ tagnit akken ad as-rreɣ tajmilt tameqqrant ɣef wayen ixeddem d wayen i d-yewwi d amaynut i tẓuri acku ẓriɣ azal yesεa urgaz-agi.
Labeεda imi i d-theggaḍ kra leqdic yeεnan arrac imecṭaḥ deg uɣerbaz imeεdar, d acu-t uḥulfu-inek ?
Yal tikelt, mi ara d-heggiɣ leqdic i warrac imecṭaḥ,; ilmeẓyen d imeqqranen dima i d-yettaken agemmuḍ yelhan. Akken ad awen-d-meslayeɣ ɣef uɣerbaz n yimeεdar, sεiɣ arrac imecṭaḥ i yekkin deg leqdic-agi, ufan-d merra dayen isehlen akken ad-begnen lebɣi-nsen acku yal aqcic iruḥ s lferḥ meqqren s taɣawsiwin i ixeddmen s yifassen-nsen.
Acu n wuguren i d-temlaleḍ asmi i d-terziḍ ɣer Wizgan ?
Ur yelli wugur yellan, imdanen merra muggren-iyi-d s lferḥ d wudem yelhan rnu nekk sεiɣ tasarut swayes qqareɣ “Azul”.
Acu n yiwellih ara tiniḍ i unaẓur aqbayli ?
Tamezwarut tlaq tebɣest, ma yella nebɣa nezmer ad nexdem ayen nḥemmel d wayen akk isehlen.
Awal-ik n taggara ?
Awal-iw n taggara, ad selmeɣ aṭas ɣef tmurt n Leqbayel ur ssineɣ ara uqbel siwa deg yisem, tura aql-i sufella n wakal-is deg Wizgan dayen yessefraḥen. Tanemmirt i Uɣmis n Yimaziɣen.
Islam Bessaci