Nemlal-itt mi tettheggi ad tecnu deg uxxam n yidles Mulud At Mεemmer di Tizi Wezzu, anda i as-tuɣal tejmilt sɣur tdukla tadelsant “Cherif Kheddam” i nettat d kra n yicennayen-nniḍen. S lferḥ d ameqqran i aɣ-d-terra awal.
Akken teẓriḍ,; zik, tacennayt iwakken ad tɣenni tettbeddil isem-is neɣ εad tettinig, maca kemm terẓiḍ asalu : teṭṭfeḍ isem n urgaz-im terniḍ-as “Massa”, amek i d-tusa tikti-a ?
Di tazwara, nebɣa ad nefk isem ameẓẓyan ajdid ur nelli ara di tmetti, nxemmem nufa-d d akken “Massa” d isem ameẓẓyan i yellan ɣur-neɣ u yerna nesseqdac-it i tmeṭṭut s tmaziɣt meḥsub “madame”, ihi nessemlal-it akked yisem n twacult Bouchafa, nufa-t yedda fell-as. Syin nerfed-it nefka isem Massa Bouchafa. Tasekkurt d tmellalin.
Ayen yellan d ajdid daɣen ɣur-m d tizlatin-nni n ccna agrawliw neɣ amḥaddi (chanson engagée) s uẓawan afessas ; ceṭṭhen ula yes-s, ma neẓra wid yeddan deg ubrid-a zik, ttawin-t-id s ssenf aẓayan. Amek i d-yella waya ?
Lweqt ibeddel, ihi nxemmem nenna-as imi i ccna afessas iwumi ssemḥasen s waṭas, ad nkemmel ad necnu tizlatin tifessasin i d-yettawin ɣef umennuɣ ɣef yizerfan-nneɣ akked tmaziɣt, nenna-as awi-d kan izen ad iεeddi. Ihi xas akken d tizlit n ccḍeḥ,; ayen nebɣa ad yaweḍ medden yettaweḍ ; d winna i d iswi amezwaru. Ula d ccḍeḥ irennu sser i leɣna. Xas akken aṭas icennayen iwumi ur yeεğib ara imi i as-rniɣ ccḍeḥ i ccna.
Acu i as-ilaqen i ccna aqbayli ass-a akken ad yaɣ amkan di ddunit ?
Laqen-as aṭas n ttawilat, mačči s ugiṭar deg wasif i yezmer ad yeṭṭef amkan. D tilibizyu akked radyu i izemren daɣen ad salint afennan. Nekni, acu ara d-iniɣ aql-aken twalam fiḥel. Yerna ilaq ccna ad yeddu di lebɣi i tsuta-agi tamaynut ; ass-a, nfaq iwacuɣer ilmeẓyen n tmurt n Leqbayel mmalen niqal ɣer ccna-nniḍen acku ma ruḥen ad d-awin lḥağa armi ur tt-nesεi ara. Ad naf iseggasen-agi ineggura kkren-d icennayen i ixeddmen ayen ḥwağen ilmeẓyen u rran-d azal i tezlit taqbaylit.
kemm i d-yettwalin timetti si tmurt n lɣerba, d acu ibedlen deg-s ?
Ğğan-aneɣ-d aṭas leεwayed yimezwura-nneɣ,; d tidet ilaq ad tent-nsif, maca s wayen yellan, nezmer ad nenhu i wiyaḍ mačči d wiyaḍ ara aɣ-d-yinin amek ara neddu. S zik taqenddurt n leqbayel tecbeḥ yerna teṣṣer i wid i tt-yebɣan. Tamurt n leqbayel mechuret s lemεawna, s lemqadra, imezdaɣ-is ttkalen kan ɣef yiman-nsen. Nessaram ad tseggem ssya ɣer zdat.
Yesteqsa-tt Lhocine Ourezki