Tessufeɣ-d Tdukla Tadelsant Adrar n Fad n At Smaɛil amnir (un guide) s tefransist ɣef wayen yerzan timerrit di Bgayet d tamnaḍt-is n usamer, iwmi tefka azwel : Béjaïa et sa région Est, Le guide.
Amnir-a yella-d iwakken ad yesnerni tamusni n yimerriyen ɣef leɛwayed, tiqsiḍin, imukan akked umezruy n kra temnaḍin n usamer n Bgayet. Gar-asent : Tici, Buxlifa, Awqas, Tizi n Berber, Ssuq Letnin, Melbu, Dergina, Tamriǧt, Taskeryut, At Smaɛil, Xerraṭa, Draɛ Lgayed, mebla ma nettu Bgayet. Yuɣal-d “le Guide” di yal tamnaḍt ɣer umezruy-ines d leɛwayed d yimukan icebḥen n tmerrit, s tteswirat i d-yeskanen ccbaḥa n yimukan-a.
Tajmilt d tameqqrant i tdukla tadelsant Adrar n Fad n At Smaɛil i ixedmen iwakken ad yeffeɣ amnir-a ɣer tafat s lexsas n ttawilat. S wakken, iɛeggalen n tdukla ur zzuxxen ara maca nnan-d kan : “Malgré le peu de moyens dont elle dispose, l’association Adrar n Fad a relevé la gageure de réaliser un ouvrage, qui n’a pas la prétention d’être accompli, certes, mais qui a le modeste mérite d’exister.” Tanemmirt i Tidukkla Tadelsant Adrar n Fad.
Djouher.C – Amastan.S