Deg ufraq n tḥuna i d-tebna lḥukuma n tallit Ḥmed u Yeḥya, anda i d-yendeh ɣef tɣiwanin d tirni ad d-bnunt mya n tḥuna ara yettwaferqen ɣef wid ur neksib kra n lemḥel ; di Bgayet, ar tura ur tent-yewwi yiwen, ula d lḥekkam n tɣiwant ar tura ur nnejmaɛen akken ad frun tadyant, ɣas akken ittaftaren ttwaxedmen, tasqamut ara yefrun lecɣal tbedd-d.
Arrac-a, isersen ddusiyat, nnejmaɛen zdat yiwen ddeg yimeḍqan anda llant tḥuna-ya, rbeɛṭac akkit, suturen deg tɣiwant ad sen-d-tefru lecɣal. Yiwen deg warrac-a, yenna : “nruḥ yakan ɣer uselway n tɣiwant, yugi ad ɣ-d-yerr s wawal. Tura aql-aɣ nebren-d ɣer Lwali d uqerru n Dayra, ahat ad ɣ-d-frun tadyant. D aya i nessutur. Win yestahlen ad yawi lḥeq-is, ad yebdu axeddim, win ur nuklal ad inadi ɣef sseɛd-is anda-nniḍen. Ur ilaq ara ad aɣ-ǧǧen akka, neḍmeɛ.”
Tiḥuna-ya, llant tid yezgan zdat uxxam n ccreɛ,; llant tid i d-yusan ɣer Madal, llan tiyaḍ ɣer lḥuma n Sidi Ḥmed.
Ait Ighil Mohand