« Mi nruḥ,; nεedda s Yiεekkuren. Segmi neffeɣ Iεezzugen, nekni daxel n tizzegzewt ; ttjur sya u sya, ibkan la ttreḥḥilen si ta ɣer ta, akken i as-yenna winna : tamurt teččur d lxir, nekni nettnadi ɣef lhem. Nleḥḥu nettɣenni, netteẓẓif, wehmen akk deg-neɣ yimsebriden, ad as-tiniḍ di lḥebs i d-neffeɣ. D tidet, amur ameqqran deg-neɣ d tikelt tamezwarut ara d-yekcem Iεekkuren. » akka i aɣ-d-yenna Lyas, yiwen seg yinelmaden-a.
Ma d Anis ikemmel yenna : « Mi newweḍ ɣer Cap Carbone, nṣub-d ɣef uḍar, yiwet yiwet srid ɣer les Aiguades. Aṭas n yimdanen i nufa din, llan ula d iberraniyen ; neεqel-iten acku leḥḥun s tεessast. Nteddu aqeṣṣer taḍsa, ur nfaq ara armi i d-nufa iman-nneɣ di tama wadda ɣer yiri lebḥer di tlemmast n yiẓra. Xas ur nezmir ara ad nεum, maca nemselxas gar-aneɣ ; wa yekkat wa s waman am yigerdan ».
« Tameddit, nuɣal-d s Uẓeffun, lebḥer lebḥer, nettwali-it am zzit, acu kan imḍebbren i yeddan yid-neɣ ugin ad ḥebsen ad nεum, nesḥassef aṭas i waya. Nnan-aɣ-d iruḥ lḥal, ad nekcem s axxam. Xas ulamma ddan-aɣ di lebɣi i kra ddqayeq, neḥbes nwala asagen (le port) n Uẓeffun, nruḥ s ccna, nezzi-d s ccḍeḥ,; amek ara nettu ass-a ? ». d wa i d awal aneggaru sɣur Linda.
Lhocine Ourezki