Sufella usayes (scène) n uxxam yidles n Bgayet Taos Amrouche, kulci ilebbeḍ,; wa d ssut wallalen n tmuzigt, wa yettnadi ɣef lxiḍ usawaḍ,; wa yeffeɣ,; wa yekcem. Lḥasun mačči aṭas iwalan acu xeddmen. Anagar ara tebdu ad treggi lḥala ad d-yaweḍ Samir, lmukellef n lecɣal sufella usayes.
S taɣect ḥnin, ad d-izuzur awal yelhan, dindin kul yiwen ad yaf ayen yettnadi, ad yaf daɣen iman-is, syin ad yuɣal ɣer ccɣel-nniḍen.
Ata amek yemmug Samir Cubban. Mi testeqsaḍ fell-as, kra ad ak-inin “Ma ɣef Samir tazerzayt iɣef tettnadiḍ ata dihin, …” Wiyaḍ ad k-d-inin “Ma ɣef Samir zerbuḍ i tettnadiḍ,; ǧǧiɣ-t dihin, …” Wid i as-yeqqaren tazerzayt, acku yettazzal, wid i as-yesawalen zerbuḍ acku yezga di tal taqernit.
Samir Cubban, mmi-s n Bgayet, ilul ass 06 dujenber 1968, d amazzan (specialiste) n ujewwaq arumi (flute traversière) akken daɣen i yetturar s waṭas n wallalen n tmuzigt. Yettwasilleɣ deg sin n lakulat, di Tubirett yakk d Sṭif, deg useggas 1987 armi 1991. Lḥirfa-s d aselmad n tmuzigt deg lakul Cuhada Burnin, di Bgayet. Maɛna mi d-tella tmeɣra, yettwanced neɣ ala, anagar ara isel yes-s, ad yazzel ad yaɣ deg-s amur. yeḥmel aṭas tamuzigt, yeḥmel aṭas asayes. Yeḥmel ad iɛiwen lɣir-is. “Win yebɣun isuter deg-s kra, ma yezmer-asen ur ibexxel ara. Ul-is ḥnin. Mi teqqimeḍ yid-s ma ur k-d-iseḍs ara ur k-isefqaɛ ara.”
Nemlal yid-s, deg wass w-3, deg tfaska tis-7 n ccna amaziɣ,; ladɣa fiḥel ma nenna-d, mi yekfa axeddim deg tesqamut n tefrant (commission du jury), yuzzel ad d-iheyyi asayes i wid ara yecnun deg yiḍ. Anagar yekfa tarusi n wallalen n tmuzigt d urigli-nsen, ata yejba-d uzagay, yegla-d s lehwa d ubeḥri. Ddunit tenneqlab, ula d iɛeggalen n tfaska xelɛen. Ma d Samir, yefra ccɣel deg uqerruy-is. Isawel-d i wid ara t-iɛawnen, yebda asiweḍ deg wallalen n tmuzigt ɣer zdaxel uxxam n yidles n Bgayet. Kulci yefra. Teddez tebrez.
Aqcic yebdan aɛfas ɣef usayes asmi yesɛa 7 yiseggasen, tura yuɣal n usayes.
A. I. M.