Ass n amhad-a (lexmis) n sdat-nneɣ, 26 deg wayyur n meɣres i ara tebdu tfaska taɣelnawt n tmedyezt tamaziɣt deg teẓrigt-is tis mraw ed kraḍ. Deg sin n wussan kan, ad d-yaweḍ uzemz i yettwarǧan seg wacḥal-aya sɣur kra wid i tecɣeb tutlayt-is, mačči kan imedyazen i terza srid temlilit, maca daɣen ula d imeɣnasen, iselmaden, imnadiyen, imyura, inaẓuren s umata, akked yineɣmasen daɣen. Deg teɣzi n kraḍ n wussan ihi (26, 27, 28 seg meɣres), ad asen-d-tili tegnit i wid ara yilin deg Udrar n Fad ad ḥeḍren i wahil s wazal-is, send ad d-nini d amerkanti. Deg wass amenzu ihi, ad ttwaldint tefsarin zik alama d tazeggant n wass. Aya ad t-id-teḍfer temzikkent n tewlafin n tnaẓurt Suzan Guhot. Deg kra n wakud syin akkin, ɣef 13s30, ad tili teldayt tunsibt n tfaska. Send ad d-yawi mass ɛli Syad asarag ɣef Tutlayt n tlawin. Syinna, ad tettunefk tegnit srid i yimedyazen deg uḥric amezwaru n umsiẓwer, alama d asteɛfu n yimensi ad tkemmel tegnit n tmenna n yimedyazen. Deg wass wis sin, sem 27 deg meɣres, ad yili tasebḥit uḥric wayeḍ n umsiẓwer alama d imekli. Mara d-uɣalen yiɛebbaḍ ččuren, ad d-tesken Massa Buxellu Malika asarag ɣef: Udmawen n twetmin deg tira n Mulud At Mɛemmer. Mara d-yili kra n usteɛfu s tecrift, ad d-ternu Wataḥ Linda asarag nniḍen ɣef: Wurar n lxalat. ɣef 17sr30, ad tili teywalt ɣef tnebgit n yiseɣ n tfaska massa Malika Dumran, i ara igen tameɣra n ccna ɣef 21sr00 deffir n yimensi lwaḥi ed yilemẓi Wali ɛebdelɣani. Ma deg wass aneggaru, 28 deg meɣres, send ad ttwaberḥen yigmaḍ n umsiẓwer n tmedyezt, ad ttwasɛeddin yirupurtajen n wid i d-yufraren deg tfaska yezrin. Tamdelt n tfaska taɣelnawt n tmedyezt tamaziɣt ad d-taweḍ dinna mettwal 13sr00 seld imekli.
M.K