Ass n lexmis yezrin 13 deg ɣuct 2009, Mass Ɛli Fergani, mmi-s n temnaḍt n Buzgan, yerza-d ɣer taddart n Wizgan s leεraḍa n tdukla tanaddalt (ASB) akked tesqamut n taddart-agi, i d-yessudsen ddurt tadelsant d tajmilt i umeɣras Bouda Mohand Said.Asarag yella-d deg uxxam n yidles Colonel Mohand Oulhadj. Aṭas n yimdanen i d-yusan akken ad slen i Mass Ɛli Fergani, d tagnit akken ad as-rren tajmilt ɣef wayen yexdem i lfayda n tmurt Lzzayer.
Tazeqqa teεmer mačči d kra, Fergani yefreḥ aṭas s leεraḍa-agi, dɣa yenna : “d tikelt tamezwarut i d-usiɣ ɣer taddart n Wizgan, d ayen yessefraḥen, tanemmirt-nwen aṭas ɣef laεraḍa-agi”. Akken i yerra, daɣen, tajmilt i tdukla tanaddalt n Wizgan akked yimezdaɣ-is, ikemmel deg wawal-is yenna d akken nesεa ilmeẓyen ifazen di yal aḥric n waddal maca txuṣ-iten kan tallelt akked ufus n lemεawna sɣur yimḍebbren n tmurt.
Mass Ɛli Fergani yenna : “aql-i ad beddeɣ ɣer yidis n yilmeẓyen, zemreɣ ad d-εiwneɣ s wayen zemreɣ akken ad nerfed ilmeẓyen-nneɣ,; wa ad dduɣ yid-sen akken ad ncetki anda ilaq.”Syen yemmeslay-d ɣef terbaεt taɣelnawt n tmurt n Lezzayer n useggas 1982, amek i tewweḍ ɣer tqacuct deg lawan-nni. Yenra yerra tajmimt tameqqrant i tarbaεt taɣelnawt n ddabex-uḍar n tura, yessarem-asen afud igerzen. Awal yezzi-d daɣen ɣef ddabax-uḍar s umata n tmurt-nneɣ d wuguren yellan, anda yesḥasef aṭas yenna : “d lawan akken ad beddlen lecɣal, ad εiwden leqwanen akken ad nelḥu ɣer zdat. Ddabax azzayri ad yesεu amḍiq-is deg umaḍal”. Γer taggara n usarag, Tidukla tanaddalt n Wizgan d tesqamut n taddart, fkan arraz azamul i Mass Ɛli Fergani, ma d netta yefreḥ aṭas yenna-d imir : “sarameɣ mačči d tikelt taneggarut ara d-aseɣ ɣer taddart n Wizgan, ncallah ad ttilint tegnatin swayes ara ad nemlil”.
Islam Bessaci