Tuɣalin s aɣerbaz attan ɣef umnar n tewwurt. Yal wa amek i yettmeslay, s kra n win temlaleḍ ad k-id-yesteqsi : Acu-t ubaxix-agi yettraǧun dderya-nneɣ ? Lḥasun, sif ula i teggeḍ,; lewzir itezzi itenneḍ,; yal ass s wulɣu amaynut, isandikiyen ɛewqen anisi ara s-kken i temsalt. Γas akken wulfen yimdanen belli lakul yeqqel d “Laboratoire”, arrac d “Les cobayes”, ur uminen ara ahat ad taweḍ temsalt s annect-a. 8 n tsaɛtin deg uɣerbaz ! d ayen ur yezmir unelmad ad as-yesber, imi yeḥwaj ad yurar, ad yesgunfu, yerna ad iɣer kra deg uxxam. D acu kan, mi ara yeqqim yiwen deg lbiru, ur t-iḥuza usemmiḍ wala uzɣal, yečča, yeswa, iban d akken ur iḥulfa ara i teɛkemt bubben wiyaḍ. Limer i terbiḥeḍ ay ul, ad d-yerzu uneɣlaf n tterbegga ɣer tudrin, neɣ ahat ɣer kra n tɣiwanin, ad iẓer amek ttidiren yinelmaden : teddun acḥal ɣef uḍar, ttbibbin iqraben nnig 5 kilu, tetten aɣrum d asemmaḍ,; qqaren di 45 yid-sen deg yiwet n tneɣrit, ma d iselsa, melba ma nessuɣzef awal. Aṭas i yerǧan asixfef deg wahil, abeddel n tmuɣli deg uselmed n tutlayin, asewjed n ttawilat imaynuten, awenneɛ n yidilisen, ziɣ ayenni akk d targit-nni n Lounis asmi Enrico yeznuzu igiṭaren di Qsenṭina.
Si tama-nniḍen, aṭas i yettwalin iselmaden rwan tiɣimit, ččan-tt barda ! Ass-a, ulac win yerwan timkelleft di lxedma am nutni. Axeddim deg uɣerbaz, wayeḍ deg uxxam. D uɣilif yezga yezdeɣ-iten, ma fehmen yinelmaden-nsen neɣ ala. Asiɣzef n lxedma alamma d 20 yunyu, ur iferru ara aɣbel n “L’echec scolaire”. Taluft-a i tt-iferrun d ahilen yebnan ɣef sswab d tmusni, d afus n lemɛawna i yiselmaden deg usnerni n uswir-nsen. Ma d abrid-agi i d-wwin akka yimḍebbren, ad aɣ-yawi wasif d asawen, wamma ɣef ukessar, acḥal aya ! Ur yelli sswab mi ara uɣalen yinelmaden d ticekkarin yettwaxedmen i uɛemmer, neɣ ahat ad ten-ttɛassan deg lakul seg walluy ar aɣelluy. Ay abrid n tifrat, mmel-aɣ abrid ɣer zdat, i yeqqar Ɛellawa.
Tura, ilaq kan ad neḥsu, ma yella dɣa ddant temsal akka, ur yelli kra usirem n tuffɣa ɣer tafat. Ur yezmir ubabat ad yessirem ad iwali mmi-s seg widen i tezdeɣ tmusni. Rwin-tt, temxurgag almi i sḥeslen ula d axlul di lɣiḍa !
M. Smail