Dɣa ula d lḥukuma-nneɣ “normal”, d axxam ur nesɛi tameddit ! Am yiḍ am wass, ur teggan ur tesgan. Cceɛb-is arqaq yettru, ma d nettat tugi ad tettru. Ih, deg cceɛb kan i terza tyita !
Deg Lezzayer n 2009, kulci yuɣal “normal”. Ilmeẓyen n tmurt-nneɣ,; mi ara d-ttwalin deg yiwen iteg tiqurar meɛna irebbeḥ irennu, ad ak-inin Normal. Ayen i yettɛemmiren ljib yeḥlel, ayen i d-yessekcamen akk asurḍi, ad ak-inin Normal. Lḥasun, awal Normal yezga deg yimawen n yizzayriyen. Ayen akk i yettawin ɣer lḥebs deg tmura yettqadaren iɣerfan-nsen ; nekni da : “Normal”. Dɣa ula d lḥukuma-nneɣ “normal”, d axxam ur nesɛi tameddit ! Am yiḍ am wass, ur teggan ur tesgan. Cceɛb-is arqaq yettru, ma d nettat tugi ad tettru. Ih, deg cceɛb kan i terza tyita ! Yenna-tt-id yerna ifuk-itt-id Si lewzir n ddyana deg tegduda-nneɣ tazzayrit, iɛawed-as-d deg radyu t-3 : “ulac igellilen deg tmurt-nneɣ.” Ur d-tezzi ssmana, yettu ayen i d-yenna yessawel ɣer zzakat deg tmurt ur nesɛi igellilen. I menhu-tt zzakat ihi a Si Lewzir ? Yewwi-d ad yelɣet Γullamllah, imi rrif-s kan, deg usqamu n lḥukuma, Si lewzir n taḍamun, mi yewt ad yesseglu ɛecra. Yeggul ur yeḥnit Uld Ɛebbas ɣef wazal n umelyun d 300 alef n twaculin i tečča tgullet deg Lezzayer ad asen-taweḍ tiquftin n waggur n remḍan. Sin n yineɣlafen deg yiwet n lḥukuma, lḥukuma tazzayrit, yiwen la k-yeqqar ulac igellilen, wayeḍ ggten yigellilen. Normal ara d-inin yilemẓyen n tmurt-nneɣ. Si lewzir n lbiɛ d ccra, ɣas akken yenna-t-id ilindi d sendilindi d win deffir-s truḥeḍ akkin, iɛawed-as-d aseggas-a. Tikelt-a, iḥella-tt-id deg le Soir d’Algérie : “d ssuq, d lqanun n leswaq, mačči d ayen iwmi tezmer lḥukuma.” Dɣa, yessendeh uselway n tegduda lewzir n taḍamun ad yessefqed ssuma n yisafaren n wučči deg leswaq. Jeɛbub yenna-d, Uld Ɛebbas yessefqed ! Akka, kif sidi kif lalla, am ugejdur am tanna, “c’est normal ya xu”, ara d-yini yilemẓi n lɛaṣima. Yebna-tt ihudd-itt ɣef lsas Si lewzir n trisiti d l’énergie yakk. Tikelt-a, seg Tubiret i as-d-iserreḥ,; yenna-k : « inegzumen n trisiti mazal ad d-ttilin deg Lezzayer yerna akka 150 yiseggasen ɣer zdat. » D tawaɣit, axir ad yesseḍmeɛ cceɛb arqaq imi am netta am nekni ur nḥedder ara ssya ɣer 150 yiseggasen. Caqib Xlil yesfat-aɣ lxedma n trisiti s lhedra-s, yessaweḍ ɣer ddar-llayas tarwa n tarwa-nneɣ ma tedder ncallah akken ad d-inin normal. Ma Si lewzir n usegmi, win ur nekkir deg ukersi-nni qrib 20 yiseggasen aya, ilaq ad ibeddel ula d netta talaba-s, ad yuɣal s tebluzt d tazegzawt. Yeɛni d lxir kan, imawlan ad ferḥen, arraw-nsen ad ɣren 8 tsaɛtin i wass, 5 wussan deg ddurt, 35 ssmanat deg useggas. Arrac ad steɛmilen ad ɣaren, iselmaden ad steɛmilen ad sɣarayen, Ben Buzid ad yesteɛmil ad ten-yettxellis. Ma d abeddel n wahilen, la ttbeddilen akken yettbeddil useggas, akken i yettbeddil wass meɛna normal imi mazal-it ɣef ukersi-nni. Yeɛni d tidet, anagar normal ara tt-iselken gar lewzirat n tegduda d uselway-nsen.
Dj. Ikhloufi