Akken i tettali ssuma n yisafaren n wučči di remḍan i yettali reffu d tuffɣa n leɛqel. Ulac ass iɛeddan mebla ma neḥḍer i yimenɣi ama deg ubrid neɣ di ssuq. Wid inehren ad d-tiniḍ bɣan ad frefren ! wid iqeṭṭun tetten s wallen ! Yal mi ara tiniḍ i yiwen atan tḍelmeḍ neɣ tesxesreḍ,; ad ak-yini : llah ɣaleb, d remḍan. Mi ttnaɣen sin, ad ak-inin d remḍan. Rnu mi ara truḍeḍ ad d-txedmeḍ kra seg lbiruyat, ad n-tafeḍ texla, ffɣen. Acimi ? D remḍan !
Ad d-nini kan tidet gar-aneɣ : zun deg wagguren-nniḍen xeddmen yimdanen akken iwata ? zun ula ttnaɣen ara ? D acu kan, imaren amzun tsetḥin cwiṭ,; dɣa ttdarin, ssufuɣen-d leɛyub-nsen deg waggur n remḍan, imi ufan s anda ara sefḍen. Ihi, d aggur i d-yessebganen leɛyub n yal yiwen, mi llan akken fren s l’hypocrisie. Qqaren daɣ wiyaḍ,; d akken reffun di remḍan, zemren ad nnaɣen ula d yimdukal-nsen. Cwiṭ n sswab maḍi maḍi, yella wass ideg nesla belli flan-nni ireffun s waṭas di remḍan yewwet ajadarmi ? Hum… Dinna qerriḥ lebsel, ttnaɣen kan wid ḥeqren.
Taluft-nniḍen, d tin yerzan iḍes. S kra n twaɣit yeḍran deg ubrid, qqaren-d d akken anehhar yeṭṭes. Di lxedma, llan wid yegganen deg lbiruyat, ɛyan, acku ɛawzen. Ur yeshil ara ad teṭṭfeḍ ttawil n usiweḍ tafejrit, imi mačči zik i beddun, gganen ! Yak yenna-d Lounis : “A win iwumi iruḥ yiḍes, di tmurt-nneɣ ara t-tafeḍ.” Ad tiniḍ izzayriyen akk ṭṭfen-d lxid-nni n lantirnat, kecmen ɣer lsit n yiḍes. Wissen kan melmi ara beddlen ɣer : www.kker.com ?
M. Smail