Imi d-yewweḍ lawan n tuɣalin ɣer uɣerbaz, yennejmaɛ lwali n Bgayet, Mass Ali Bedrici, d yinemhalen n srabes n twilayt akked d yiselwayen n dairat, akken ad walin anda i wwḍen lecɣal n uheyyi i useggas n tɣuri 2009/2010.
Iban-d belli ad ldin 76 tneɣriyin tijdidin i yiɣerbazen imenza deg Ssuq-Letnin, Wadɣir, At Smaɛel, atg. I uswir wis sin, ad ldin 6 yiɣerbazen deg tɣiwanin n Aqbu, Bni-Ksila, Iɣil-Aɛli, Buḥemza, Mellala akked Cellaṭa. Daɣen, ad rnun ad ldin 21 n yisečča (cantines) deg yiɣerbazen yemxallafen n twilayt. Ma deg wayen yerzan addal deg yiɣerbazen, ad bdun lecɣal n yinurar akked tzeɣwin n waddal deg tesnawiyin i yellan deg tɣiwanin n Bgayet, Ticci, Dreɛ-Lgayed, Aqbu, Tazmalt, Melbu, Xerraṭa, Ssuq-letnin.
D. I.