Ilmend n waggur n Remḍan, taɣiwant n Leɛgiba tezzel afus-is ɣer twaculin yenḥafen akken ad asent-tessiweḍ kra n yisafaren n wučči. Azal n 270 yiḍellaɛen i d-tessewjed tɣiwant-agi, yal yiwen yessaweḍ ɣer wazal n 3500 yidinaren. Imḍebbren n twilayt fkan-d 70 yeḥricen ma d ayen i d-yeqqimen d taɣiwant i t-idemnen. Ilaq kan ad d-nesmekti d akken tikelt-agi imḍebbren n tɣiwant gren tiɣri i tdukliwin yellan di tudrin akken ad kkint deg ufran n twaculin yenḥafen s tidet, acku ma nwala acḥal i d-yessuturen lemɛawna-agi d ayen iwumi ur tezmir tɣiwant ad t-teddem.
Γas akken llan ahat wid ixaqen imi ur ten-id-isaḥ kra, wid yellan di lixsas sfaydan s wamur yettuqadren, imi ad naf : awren, lqahwa, ssker, zzit, ayefki, ccerba, tumaṭic, lḥemmez.
Ilaq kan ad d-nini daɣen belli mi ara nwali acḥal yettrajun lemɛawna n tɣiwant di tallit am ta, d ayen yettɣaḍen s waṭas, imi yessebgan-d timmuɣbent d yir taswiɛt ideg ttidiren yemdanen. D lawan ideg ara isuɣ umdan deg wudem n wid ijebbden kerfen, ahat ad ldint tewwura n lxedma.
M. Smail